Ramazan ayı aqqında 5 meraqlı malümat
Bizim yaş er şeyni bilmege sevgen, yaş oquyıcılarımız!
Biz şimdi mubarek Ramazan ayındamız. Bu güzel, fevqulâde ayı aqqında daa çoq bilmege isteseñiz, keliñiz şu 5 meraqlı malümatlarnı oquyıq!
Malümat № 1: Ramazan — islâmiy taqvimniñ 9-nci ayıdır.
İslâmiy taqvimi – qamer taqvimidir. Anda da 12 ay bardır. Olarnıñ arasında Ramazan ayı 9-nci ay sayılmaqta. Er bir ay yañı qamer doğuşınen başlana.
Malümat №2: “Ramazan” sözü arapçadan “yaqqan”, “yaqqan sıcaq” kibi tercime etile.
Malümat №3:Ramazan ayında eñ mubarek, eñ hayırlı (biñ aydan daa hayırlı olğan) bir gece saqlanmaqta.
Şu geceniñ adı – Qadır gecesidir. Quranı Kerimde bu gece aqqında “Qadır” adlı bir sure bardır. O gece Quranı Kerim enmege başladı. Bunıñ içün Ramazan ayğa Quran ayı, dep aytıla, ve bunıñ içün, bu ayda Qurannı çoq oqulması ve ögrenilmesine diqqat etmek kerek.
Malümat №4: Ramazan ayı devamında hususiy bir namaz qılına. Bu Teravih namazıdır.
Teravih namaz – Peyğamberimizniñ (salâllahu aleyhi ve sellemniñ) sunnetidir. O yatsı namazından soñ qılına, 8 ya da 20 rekâttan ibaret. “Teravih” sözü arapçadan “raatlıq” demektir. Çünki şu namaznı qılğan insanlar er 4 rekâttan soñ oturıp, zikr etip, raatlanalar.
Malümat №5: Eñ uzun Ramazan (oraza) künleri 2016 senesinde edi.
2016 senesi Ramazan ayı tamam yaz künlerine rastkeldi. Bilgenimiz kibi, yaz künleri eñ uzun sayılmaqta (iyün 22 künü yılnıñ eñ uzun ve küneşniñ yazlıq turuşı künüdir). 2017 senesinden başlap, ve taqminnen daa 16-17 sene devamında oraza künleriniñ uzunlığı ket-kete qısqaracaq.
Gülsum ŞİRİNSKAYA
