Qalq ayaqqa!

Kuçük halqsıñ,seniñ buyuk tarihıñ

Qahar-qayğı,azaplardan sarardı

Ğayet ağır,meşaqatlı taqdiriñ

Iftira vefaciadan qarardı.

 

Haq-huquqtanseni mahrum eterek,

Kozyaşıña qara qanlar qattılar.

Irkilmeden esirlikke çekerek,

Seni cennet Vatanıñdan attılar.

 

Qara deñiz dalğalanıp, okürip,

Ateş tüşken yurtum içün çağladı.

Qart Çatırdağ azaplanıp, okünip,

“Qayda kete tatarlar?” – dep ağladı.

 

“Iz qalmasım qırımtatar adından!” –

Deseler de,varlığıñnı saqladıñ.

Yıllar keçti,istiraplar içinde

Merd kureşnen şerefiñni aqladıñ!

 

Mezarlarıñ tolsalar da şehitnen,

Kureş azmiñ yorulmadı-talmadı.

Yer yuzünde facianı bilmegen,

Añlamağan insanendi qalmadı.

 

Qalq ayaqqa! Koter egik başıñnı!

Ğurur ileyaşa ana-Vatanda!

Yeter endi:sil kozüñniñ yaşını –

Şan ve şuretlâyıq seniñ adıña!

 

Qalq ayaqqa!Seni Vatan çağıra!

Bekley seni sönip qalğan ocaqlar,

Tamırıñnıpekit ulu Çatırğa –

Vatan seni alğış ile quçaqlar!

Eskender Fazıl  (1934-2003) – şair, qırımtatar milliy areketiniñ iştirakçisi

                                               1987s. Moskva