PAYIZ ÇÖHRƏSİNDƏ YAZDI 44 GÜN – Tapdıq Əlibəyli
Nazım Ahmetli
Kırımınsesi Gazetesi
Azerbaycan Temsilcisi
Tapdıq Əlibəyli
PAYIZ ÇÖHRƏSİNDƏ YAZDI 44 GÜN
Bürüsə də duman, çən Qarabağı,
Zəfər çiçəklədi bağrının dağı.
Yadda boz illərin çiskin-sazağı…
Payız çöhrəsində yazdı 44 Gün.
***
Döyüş meydanında yenildi yağı,
Düşmən sırğa etsin qoy ağ bayrağı!
Sərkərdə gur çatıb tonqal, ocağı…
Qələbə tarixi yazdı 44 Gün!
***
Vətən bel bağladı əsgərə-ərə,
Oğullar sinəsi döndü sipərə…
İşğalçı tuş gəldi Polad təpərə!
Hayların halayın pozdu 44 Gün!
***
Əsir torpaqlarda sərgərdan ruhlar,
Torpağa üz sürtüb çəkilən ahlar
Xilaskar Ordumla şad bu sonbahar!..
İşğalçı ordunu əzdi 44 Gün!
XİLASKAR ORDUMUN VƏTƏN SAVAŞI
Ordumun müzəffər, haqq səsi gəlir,
Qələbə qoxulu nəfəsi gəlir…
Allahın da xoşu, həvəsi gəlir,
“İrəli!” marşından Azərbaycanın!
***
Əsir torpaqlara dəyir ayağım…
Uğrunda qaynayır qan, Qarabağım!
Ali Baş Komandan – Döyüş Bayrağım,
Vətən savaşında Azərbaycanın!
***
Yağı qıfilına Ordumuz açar,
Məğlub aqibətə işğalçı düçar,
Qəsbkar erməni boğulur naçar…
Sevinc göz yaşında Azərbaycanın!
27 sentyabr 2020
QƏLƏBƏ TƏQVİMİN MÜBARƏK
Doğub Qarabağda zəfər günəşi,
Vətən, mübarəkdir yeni təqvimin!
Üfüqlər seyr edir yurda dönüşü,
Müzəffər əsgərə hay verir himnim.
***
Vətən köynəyindən keçən oğullar
“Qarabağ bizimdir!”deyib, and içdi.
Ali Baş Komandan şəstlə: – Uğurlar!
Dilədi, Ordumuz hücuma keçdi…
***
Şanlı tarix yazır Xilaskar Ordu,
Bayraq şöləsində zəfər günləri.
Mübariz, Poladlar, Şükürlər yurdu
Yağıya görk etdi mərdlik, hünəri…
***
Çatıbdır düşmənin ağ bayraq vaxtı,
Silinir təqvimdən tünd qara günlər.
Qələbə coşqulu “Azadlıq” taxtı
Əsgər ayağına səpəcək güllər…
QƏLƏBƏM – QƏLP QƏLBƏ QƏLPƏ
Üzümdən-gözümdən işıq ələnir,
Qələbəm qəlp qəlbə qəlpə kimidi…
Üçrəngli Bayrağım nura bələnir,
Sevincə yaş tutan bəllidi kimdi…
***
Qürurum, Sərəfim – Azərbaycanım,
Qeyrətsən, Heyrətsən, ərən şəstinlə!
Zəfər yürüşünlə qaynayır qanım,
Dünya hesablaşır artıq Səninlə!..
***
Doğub Qarabağda zəfər günəşi,
Zəfərgözlü şəfəq göz qamaşdırır.
Ordumun çiynində Vətən savaşı
İşğala son qoyur, sədləri aşır…
***
Şaddır Şəhidlərin zəfərlə Ruhu,
Düşməndən qisasın alındı, Vətən!
Ovunur qovrulan torpağın ahı…
Vətən, qəhrəmandır Əsgər, Sərkərdən!
noyabr 2020
YAĞILAR GÖRMƏKDƏ TÜRK QÜDRƏTİMİ
Türk- Nuh peyğəmbərin oğlunun adı,
Tanrı bəxş edibdir dövlət günəşi.
Əyib zaman-zaman düşməni-yadı…
İsidib torpağı odu, atəşi.
***
Nifrətim qılıncla, sevgim qopuzla
Boy verir tarixin neçə qatından.
Ulusum qovuşur Xaqan Oğuzla,
Qanım rəng alıbdır Qorqud zatından.
***
Tarix səhnəsində ərlər- ərənlər
Yazıb salnaməsin ox-nizəsiylə.
Bu torpaq yetirən gör necə öndər,
Adın təsdiqləyib Türk imzasıyla!
***
Hakimiyyət rəmzi – yay, məğrur Türkün;
Qovğa günlərində çəkilib tarım.
Həmişə çaparlı qoy yolu Türkün,
Qoru bu milləti, qoru, sən Tanrım!
***
Ulu Odlar yurdum – Azərbaycanım
Bu gün göstərməkdə ər qüvvətini!
Esit, zərrə qədər yox həyacanım…
Yağılar görməkdə Türk qüdrətimi!
ŞƏHİDİN QAN YERİ – TORPAĞIN SAN YERİ
Şəhidin qan yeri –
Torpağın san yeri!
Hər qarış Vətəndir,
Şəhidi an, yeri!..
***
Uçrəngli bayrağım –
Hürriyət sorağım!
Azadlıq yolunda
Şəhidlər çıragım.
***
Göz dikib yağılar…
Sinəmdə dağı var!
Şahidi şəhidlər,
Nəsillər unudar?..
***
Şəhidin qan yeri –
Torpağın san yeri!
Hər qarış Vətəndi,
Şəhidi an, yeri!..
ŞƏHİD MƏZARI
Azərbaycanın ərazi bütövlüyü uğrunda
canlarını fəda etmiş Şəhidlərimizin müqəddəs xatirəsinə
Torpaq vətənləşər Şəhid qanıyla,
Vətən bütövləşər Şəhid qanıyla,
Torpağın bətnində adı-sanıyala
Vəhdət məqbərəsi – Şəhid məzarı.
***
Vətən köynəyindən keçən oğullar,
Andını torpağa içən oğullar,
Vətənçün canından keçən oğullar
Qeyrət bünövrəsi – Şəhid məzarı.
***
Daşlaşan zamandır daş kitabələr,
Dindirsən hər daşı, keçmişin söylər.
Burda neçə-neçə igidlər, ərlər…
Qüdrət səlnaməsi – Şəhid məzarı.
***
Vətən qısılanda, çəkəndə ahı,
Oğullar istəyir şəhid dərgahı.
Dünəni, bu günü, həm də sabahı,
Hörmət minarəsi – Şəhid məzarı.
***
Yazılır yurdumun qanla tarıxi,
Şəhid övladları canlı tarixi.
Vətənin, torpağın şanlı tarixi
Şan-şöhrət nəğməsi – Şəhid məzarı.
***
Qanla suvarıldı Vətən torpağı,
Qanlı köynək oldu Vətən bayrağı.
Torpağın, Vətənin rəmzi dayağı
Hürriyyət kəlməsi – Şəhid məzarı.
ŞƏHİDLƏRƏ SALAM OLSUN
Səhid – yurdun şah damarı,
Əbədiyyət, cənnət barı…
Haqq sevdalı Tanrı yarı
Şəhidlərə salam olsun!
***
Körpələrin yuxusundan,
Süd ətirli qoxusundan,
Dan yerinin yaxasından
Şəhidlərə salam olsun!
***
Ərənlərin dünyasından,
Anaların duasından,
Elin ismət, sonasından
Şəhidlərə salam olsun!
***
Şuşamızın havasından,
“Xarı bülbül” həvəsindən,
Qarabağın nüvəsindən
Şəhidlərə salam olsun!
***
Bayraq, zəfər şöləsindən,
Himnimizin hürr səsindən,
Azərbaycan kürsüsündən
Şəhidlərə salam olsun!
***
Vətənin dağ, qayasından,
Məram, məslək, qayəsindən,
Arzuların boyasından
Şəhidlərə salam olsun!
noyabr 2020
ƏSGƏR – ƏN MÖTƏBƏR
Gözündə dan yeri sökülən əsgər –
Zülməti yenməyə hər an səfərbər!
Döyüş meydanında adı müzəffər,
Şəhiddir, qazidir! O, ən mötəbər!..
***
Qarabağda döğan zəfər günəşi –
Bayraq şöləsində əsgər gülüşü…
“44 Gün” dəyişdi haqsız gərdişi,
Üfüqlər seyr edir yurda dönüşü…
***
Savaşda əsgərin sinəsi səngər …
Silindi təqvimdən tünd qara rəglər.
Yağılar bağrına yağdı güllələr,
Qaliblər başına səpildi güllər…
***
Gözündə dan yeri sökülən əsgər –
Zülməti yenməyə hər an səfərbər!
Döyüş meydanında adı müzəffər,
Şəhiddir, qazidir! O, ən mötəbər!..
ZƏFƏR PARADI
Baş meydan başını dik tutub, Yurdum,
Sinəsin süsləyib Zəfər paradı.
Müzəffər yürüşdən dönübdür Ordum,
Şəhid, qazı, qalib – əsgərin adı!..
***
Salam, 44 Günlük döyüş bayrağım!
Şöləndə şanlı yol, Vətən savaşım.
Salam, halal haqqım, Zəfər bayramım!
Səninlə üzüm ağ, ucadır başım!..
***
Azadlıq meydanı meydan sulayır,
Düşüb sümüyünə Şuşa havası.
Qələbə diliylə salam söyləyir,
Himnimin səsində şövqü, həvəsi…
***
Haqqın təntənəsi – Zəfər paradım
Qalibin məğluba ibrət dərsidir.
Neçə Mübarizim, neçə Poladım
Millətin əzəmət, qürur səsidir!
***
Səsin, Azərbaycan, ucadan gəlir!
Simana Qarabağ işığı düşür…
Zəfər günəşinlə səfəqlənib dan,
Şahinlər gözündə yer-göy görüşür…
10 dekabr 2020-ci il
VAXTIN TAXTI – “İYİRMİ DÖRD SAAT”
Hər saniyə, dəqiqəsi
qəhrəmanlıq salnaməsi –
“24 Saat”!
Vətən torpağına içilən and –
Neçə-neçə Şəhid Ad…
O saatlarda Xocalı bir Bayraq dikəldi,
“44 Gün” bir boy diksinmişdi…
Daha neçə-neçə əsir-yesir yurd yerimiz
sinəmizdə çalın-çarpaz dərd-sərimiz…
Korşalan yaddaşımızın yadırğadığı,
yağıların yağmaladığı,
gəda yadların-yanların yalmandığı
yurd yerimiz Xankəndimiz
“24 Saat”la gələndə üzbəüz,
qərinələr, illər 24 saata sığındı, sığdı.
Üzündün-gözündən zəfər sevinci yağdı.
Yağdı zəfər sevinci
qələbə qoxulu qazilərin qayəsindən.
Yağdı Tanrı yarı Şəhidlərin ruhuna
Azərbaycan səmasından,
Uca Bayraq simasından,
Qarabağın havasından,
Xarıbülbül həvəsindən,
Ərənlərin dünyasından,
Anaların duasından,
Körpələrin yuxusundan,
Dan yerinin yaxasından
cənnət qoxulu rəhmət.
“24 Saat” – Azərbaycanın haqq səsi!
Hər saniyə, dəqiqəsi
qəhrəmanlıq, Zəfər salnaməsi –
“24 Saat” Qarabağ vaxtı –
Vaxtın taxtı!
sentyabr 2023
