Açlıqtan Olgen Bala
Qardaşlarım-Server, Mambet ve Yaqub açlıqtan oldiler
Qırq beş yıl sustım men.
Sebebi belli-
Yoq edi sözümni diñleycek adam.
Yurekni açmağa
Vaqıt da keldi-
Keçmişten
Siz taba
Atmaqtam adım.
Keçmişten-
Bu doğru.
Çünki er bir yıl
Yuz yılnıñ yerini bastı
Eñ azdan.
Yurmege yoq edi
Sedsiz,
Temiz
Yol
Ne kuzde,
Ne qışta,
Ne baar-yazda.
Keçmişten söyleyim.
Yalanı yoq iç.
Yalannıñ yanına barmağan edim-
Daima dost edi
Doğru söz,
Sevinç…
Yalannı sevmegen
Babam ve dedem.
Felaket bastırıp kelgende
Tañda,
Beş yaşta
Edim men-episi olip.
Sebebin bilmeden
Ateşte yandım,
Qaç kere tirilip,
Qaç kere olip.
Çöllerden, sahradan keçken
Aç yollar,
Aç yıllar
Oldılar
Men garip içün.
Omuzım ustüne
Tizildi olar.
Ağırdı vucudım.
Ağırdı içim!
Menzilge yetkence
Qartaydım,
Taldım,
Beş yaşta ekende,
Yurtumdan çıqıp.
Tañrimden
Biñ kere
Soradım
Yardım!
Eşitmedi, galiba,
Kettim men çökip.
Artımdan taqıldı
Eki qardaşım.
Çoq keçmey
Qıymetli bitam ve anam…
Çöktiler
Biñlernen soy-sop, yurtdaşım.
Çökken soñ da, yandım.
Ala daa yanam…
Açlıq ne ekenin
Sorañız menden.
Bir qapım otmekke
Kozümni oyıp
Bermege azır edim
Er kun,
Er ande…
Neyleyim,
Koz yumdım,
Arzuma toyıp.
Çıplaqlıq ne demek-
Sorañız menden.
Ustümde bar edi bir cartı kolmek-
Çaresi yoq onı çıqarmaq
Bitlegen,
Kirlengen
Olsa da o pek.
Aqsızlıq ne demek-
Sorañız menden.
Satqınnıñ balası dediler maña.
Şu sözden muğayıp,
Çıraqday söndim…
Kimge kuç-
Sizgemi?
Aytıñız qana!
Balanıñ yuqusın
Saarde bolmek,
Vatansız yaşamaq,
Vatansız olmek,
Ne demek,
Adamlar,
Sorañız menden!
Bilmek kereksiñiz bularñı,
Bilmek!
Adamlar,
Siz taba barır ekenim,
Ruhumnı kotere
Taze
Ruzgarlar.
Halqımnıñ quvançıñ sezip,
Sevinem.
Lakin de
Qıynağan bir tüşüncem bar.
Soy-sopum,
Butün halq
Koçecek yurtqa.
Bu aqta er yerde
Qızğın laf kete.
Yollar açılmaqta
Yaşqa ve qartqa!..
Qalacağım
Men ise
Kene gurbette.
Elbette,
Men qarşı degilim bahtqa.
Yurtdaşlar,
Tileyim oğurlı yollar.
Çıqıñız yuksekke,
Evelki tahtqa.
Meni de hatırlap tursañız olğan.
Hatırlap turıñız
Aydın kunlerde-
Derviza, bayramda,
Toy ve dügünde.
Sararğan yapraqlar
Tüşkende yerge.
Çeçekler ve guller tatlı kulgende…
Açlıqtan Olgen Bala Monologı-İsa Abduraman
