Nadir Qüdrətoğlu – Şeirler

Nazım Ahmetli

Kırımınsesi Gazetesi

Azerbaycan temsilcisi

Nadir Qüdrətoğlu

Bir xatirədir

Bir xatirədir susan kamança,
Oynaq barmaqlarda qalan xatirə.
Bir qaval, bir sazdı, bir ay işığı,
Hər qəlbə xoş xəyal salan xatirə.

              ***

Bir xatirədir torpaqla barış,
Bəxtə yazılanlar unutdu yolu,
Nə qədər ömürdür, o qədər yarış.
Ötüb getdi qatar, bax itdi yolu.

                  ***

Bir xatirədir yalan da, düz də,
Dünyanı içində gəzən adamlar,
Görünən üzlər, gizlənən sözlər,
Hamısı keçmişdə qaldı o anlar.

                       ***

Bir xatirədir sonuncu nəfəs,
Gözlər bağlananda gördüyün itər.
Bir quş qanadında uçur hər həvəs,
Həqiqət susanda zaman da bitər.

                    ***

Baxsan xatirədir, bu ömür, bu yol,
Hətta bir şeirdə yazılıb gedər.
Dünyadan nə qədər yazan olsa da,
Həyatı şairlər ən çox dərk edər.

Sözüm taleyimdən yazılmış kitab

Varım bir çıraqdır, şeirimsə alov,

Külün də içində doğular yenə.

Hər misram torpağın bağrında toxum,

Hər sözüm göylərə uçan bir dənə.

                            ***

Varım qılıncdırsa, şeirim qalxan,

Misram mənə aid, özümə xasdır

Sözüm ocaqlarda yanan köz kimi,

Əcdad nəfəsindən gələn mirasdır.

                      ***

Qəlbimdən süzülən damladır şeir,

Çay olub axaraq dənizə gedər.

Sözüm bir ağacdır, kökü min illik,

Budanıb böyüyər, boy verər, bitər.

                     ***

Sözüm taleyimdən yazılmış kitab,

Hər misra içində bir sirr, bir cavab.

Könül bir karvan tək yol gedər durmaz,

Orda qonaqlayan ömür bir hesab.

                         ***

Bir gün bu dünyadan köçsəm də, belə,

Sözlərim həmişə olacaq öndə.

Varım bir sözümdür, bir də şeirlər,

Onlarla ölümsüz qalaram mən də.

Ay gəncliyim salamat qal, salamat

Ömrün bahar çağı yaman xoş idin,

Ay gəncliyim, salamat qal, salamat.

Xəyalında min arzunu daşıdın,

Ay gəncliyim, salamat qal, salamat.

                       ***

Qartal kimi göy üzündə uçardın,

Günəş kimi hər ürəyə saçardın.

Yel qanadlı arzularla qaçardın,

Ay gəncliyim, salamat qal, salamat.

                         ***

O gəzdiyim dərələr var, düzlər var,

Görmək üçün doymadığın üzlər var,

Xatirə tək yaddaşımda izlər var,

Ay gəncliyim, salamat qal, salamat.

                          ***

Bahar kimi könlümə gül-çiçəklə.

Dalğa kimi oynadın sən küləklə,

Yaman oldu zarafatın ürəklə,

Ay gəncliyim, salamat qal, salamat.

                            ***

Ömür getdi qocalığı seçdin sən,

Köhnə yolu karvan kimi keçdin sən,

Zaman gəldi keçmişimə köçdün sən,

Ay gəncliyim, salamat qal, salamat.

Düşüncə qatarı

Rəngli işıqlardan bir qatar keçir,

Bilinməz məchula aparır məni.

Dəmir yollarında düşüncəm axır,

Tənhalıq dünyadan qoparır məni.

                    ***

Bir vaqon içində arzular yatır,

Tək bir bilet alıb o gələcəyə.

Sözlərim buxara dönür, dağılır,

Yollarım uzanır zülmət gecəyə.

                     ***

Baxışım yolları sayır birbəbir,

Bulud göz yaşın tökür içimdə.

Bu qatar mənimdi yönünü bilmir,

Ürəyim xəttləri çəkir içimdə.

                       ***

Bu qatar hey gedir dərinliklərə,

Varlıqla yoxluğun boş kölgəsində.

Təkərin bu səsi düşüncəm kimi,

Dolanır beynimin dar döngəsində.

                      ***

Relslər qarışıqdı, yol əyri, dərin,

Bir xəttdə ağlıma ayrılıq gəlir.

Hər təkər altında bir arzu qalır,

Bir fikir doğulur, bir fikir ölür.

Axı nə yatdım ki, nə yuxu görüm

Açılır səhərlər, günüm dar gəlir,

Axı nə yatdım ki, nə yuxu görüm?

Könlümə nə işıq nə bahar gəlir,

Axı nə yatdım ki, nə yuxu görüm?

                   ***

Küləkdən soruşdum, cavab almadım,

Bir ömür yaşadım, naşı olmadım,

Könlüm quş kimiydi, uçdu, qalmadı,

Axı nə yatdım ki, nə yuxu görüm?

                         ***

Sonuncu saat da qum kimi tökür,

Əqrəblər zəncirtək qolumu bükür,

Ömrümün divarı qaranlıq çəkir,

Axı nə yatdım ki, nə yuxu görüm?

                        ***

Gecənin yuxusu gözümdən qaçar,

Ulduzlar göylərdə işıqtək saçar,

Bu sirr qapısında görünmür açar,

Axı nə yatdım ki, nə yuxu görüm?

                      ***

Alnıma ən çətin günlər yazıldı,

Xoş günüm pis gündən yaman az oldu,

Məzarım içimdə vaxtsız qazıldı,

Axı nə yatdım ki, nə yuxu görüm?

Bəs nəyə lazımdır bu ömür yolu

Bu gün doğuluruq, sabah ölürük,

Bəs nəyə lazımdır bu ömür yolu?

Dünya bir səhradır biz yol alırıq,

Bəs nəyə lazımdır bu ömür yolu?

                          ***

Biz ki bəxtimizlə tez barışırıq,

Dünyanın dərdiylə biz alışırıq.

Sonunda torpağa biz qarışırıq,

Bəs nəyə lazımdır bu ömür yolu?

                        ***

Titrəyir budaqda ürkək bir yarpaq,

Bir səssiz dua var ulduzdan uzaq.

Sanki Tanrı bizi sınayır ancaq,

Bəs nəyə lazımdır bu ömür yolu?

                       ***

Yanır bir şam kimi taleyin izi,

Əriyir saatda ömrün dənizi.

Axşamın kölgəsi udur gündüzü,

Bəs nəyə lazımdır bu ömür yolu?

                       ***

Çöldə bahardı qəlblərdə qışdı,

Bəlkə də hər gediş bir qayıdışdı,

Həyatın yolları eniş, yoxuşdu,

Bəs nəyə lazımdır bu ömür yolu?

Yoxdur bu dünyada səndən gözəli

Günəşdən nur alır dəniz aynası,

Səninlə gözəldir ömrün hər ili.

Gecənin qəlbində doğar sabahı,

Yoxdur bu dünyada səndən gözəli.

                   ***

Sən mənim ömrümün yar-yaraşığı,

Sevginin səcdəsi, eşqin qonağı.

Könül kitabımın solmaz varağı,

Yoxdur bu dünyada səndən gözəli.

                     ***

Qəlbimin solmayan çiçəyi, bağı,

Adınla nurlanır ömrün hər çağı.

Mənim dualarım tək sənlə bağlı,

Yoxdur bu dünyada səndən gözəli.

                     ***

Sən mənim qəlbimin yaşam həvəsi,

Sən könül sazımın ən incə səsi

Sən Tanrı dərgahı, eşqin nəfəsi,

Yoxdur bu dünyada səndən gözəli.

                      ***

Görmədim cahanda sən tək incini,

Bu can sənin ilə alır dincini,

Özün duy qəlbimin bu sevincini,

Yoxdur bu dünyada səndən gözəli.

Gərək yol seçəsən bu dünyada

Gör nə çox ikili yollar var indi,

Düzü danışanın yoxdu hörməti.

Ya çıx qarşımda, dur kişi kimi,

Ya da birdəfəlik qaç gizlən qəti.

                  ***

Əqidə dəyişən dost istəmirəm,

Külək hardan əssə, orda bitmirəm.

Bir yol seç, get onla sonuna qədər,

Qorxaqla heç zaman mən yol getmirəm!

                         ***

Bayrağı tutmusan, əyilmə, daşı,

Onun kölgəsində gizlənmə, qaçma.

Ya ol birdəfəlik bu xalqın özü,

Yada ki, satılma, yada əl açma!

                           ***

Şairlik libasın geymə boşuna,

Əgər bilmirsənsə sən sözü üstün.

Düşüncə bir yükdür, daşımaq çətin,

O yolda ləngiyən, batır, büsbütün!

                         ***

Yarım söz, yarım yol, yarım ürəklə,

Ya ol birdəfəlik, atıl hər oda.

Olmur bu dünyada iz qoymaq belə,

Gərək yol seçəsən bu dünyada da!

Keçmə namərd körpüsündən

Keçmə dostum o körpü bir tələdir,

O, sənə heç zaman xeyir gətirməz

Bu körpü üstündən keçən uduzar,

Sonunda heç kimi dada yetirməz.

                             ***

Namərdlər əl açar, gülər üzünə,

Bir ovuc var üçün satar sözünü.

Bir gün haqq göstərər yolun düzünü

Tanımaz kölgən də sənin özünü.

                        ***

Keçmə o körpüdən, çökər altından,

O yalan zəfərin ömrü az olar.

Haqqın kölgəsində sən məğrur dayan,

Yoxsa sabahın da qara yaz olar.

                          ***

Qan qoxuyur o körpünün daşları,

Haqq susanda nahaq haqqını danmış.

O yol ilə gedən alçaq zatların,

Varlığı da, kölgəsi də yalanmış.

                        ***

Keçmə namərd körpüsündən,

Qoy aparsın çılğın axan sel səni.

Tuzaq qurub gözləyən var əzəldən,

Kim bilməsə yaxşı bilir el səni.

Buqələmun insanlar

Bayraq tək əyilər, külək tək əsər,

Haqq ilə döyüşər buqələmunlar.

Əlləri namazda, ürəyi bazar,

Dərisin dəyişər buqələmunlar.

                          ***

Məclisdə mələkdir, təklikdə şeytan,

Suda balıq kimi sürüşər yaman,

Döyüşdə qılınc yox, qalxandı hər an,

Şəklini dəyişər buqələmunlar.

                       ***

Haqdan uzaq düşüb, hey danışarlar,

Vicdan bazarında tez alışarlar.

Hamıya qaynayıb tez qarışarlar,

Əslini gizləyər buqələmunlar.

                    ***

Hər rəngə bulaşdı, hər rəngə girdi,

Kölgədə şeytandır, işıqda pirdi.

Görünən insan yox, əsil kafirdi,

Ruhunu itirər buqələmunlar.

                     ***

Baxanda insandır, dinləyəndə boz,

Bax onun rənginə həqiqətə yoz,

Maskası saysızdır, özü bir dayaz,

Ömrün boşa verər buqələmunlar.

Sevməyin özü də sənətdir vallah

Sevməyin özü də sənətdir vallah,

Gah xoşbəxt olarsan, gah çəkərsən ah.

Bir sözlə gül açar, qönçə yaşarar.

Bir baxış içində qırılar sabah.

                 ***

Sevməyin özü də sənətdi vallah,

Ustad ürəklərdə doğular bu hal.

O sənət bir ömür boyu olar şah,

Könüllər içində çəkilər misal.

                   ***

Sevməyin özü də sənətdi vallah,

Hər könül qavraya bilməz bu sirri.

O sənət duyğudur, o sənət Allah,

Verdiyi ən böyük hikmətdi biri.

                       ***

Sevməyin özü də sənətdi vallah,

Rəssamtək çəkərsən fırçanı hər an.

Bir könül sevdimi, qırmaz heç asan,

Həqiqi sevəni dəyişməz yalan.

                        ***

Sevməyin özü də sənətdi vallah,

Ustası az olur bu qədim işin.

Könül qırmamaq da bir növ ibadət,

Bir də qorumaqdır sevgini düşün.

Saxla öz dünyanın içində məni

Saxla öz dünyanın, içində məni,

Saxla itirməyim heç vaxt izimi.

Ürəyin bir sirrdi, gizli bir qapı,

Mən onun içində tapdım özümü.

                     ***

Unutma, bu dünya dar olsa belə

Saxla öz içində, kənara qoyma.

Mənə yer ver orda, biraz olsa da,

Heç vaxt bu ürəyə, bu cana qıyma.

                         ***

Saxla, bir quş kimi yorğun qanadla,

Sən ol son limanım, ən son durağım

Dənizlər dönsə də, tufan içində,

Solmaz ürəyimdə məhəbbət bağım.

                       ***

Mən sənin içində yuxu kimiyəm,

Gəl tut əllərimdən qəlbinə apar.

Başqa nə istəyim, nə dərdim var ki

Saxla öz içində, orda bahar var.

                        ***

Sənsiz bu şəhərdə hər şey yarımdı,

Sənin varlığınla Nadir tamamdı.

İtmişəm, tap məni sənin izində,

Saxla öz içində, daha zamandı.