Dünya Qırımtatar Derneği, Qırım Müftiliği,Qalay medresesiniñ eñ güzel oquğan qız talebelerini taqdirledi
İmam Maturidiy adına Qalay islâmiy ilimler medresesiniñ doquz eñ güzel oquğan qız talebesi, muvafaqiyetli oquvlarınıñ mukâfatı olaraq, Aqmescitke kezintige alıp barıldı. Olar “Meganom” ticariy merkezinde yerleşken “Buztaylaq”-qa barıp eglendiler.
“Talebelerimiz bugünni tolu ve zevqlı şekilde keçirdiler. Kezintini pek begendiler. Oquv yurtumıznıñ eñ yahşı oquğan talebelerini böyle kezintilernen taqdir etmek artıq ananemizge çevirildi”, – qayd etti medreseniñ tahsil-terbiye işleri boyunca müdir muavini Ayşe Lümanova.
Bundan da ğayrı, qızlar “Hazine” tükânını ziyaret etip, mında ananeviy qırımtatar nağışçılığı, ameliy sanat eserleri ve qırımtatar ressamlarınıñ işlerinen tanış oldılar. Bu güzel künni ocalar ve talebeler “Şeñ” qavehanesiniñ sıcaq müitinde yekünlediler.
