Anamnıñ duası
Sabah erte,
Tañ atqanda,
Dua ete anam…
Dua sözlerin tekrarlap,
Yavaşçıqtan aytam:
– Rabbim, Tañrım,
Eşit meni,
Aytqanımnı diñle,
Sen qudretli olğanıñnı
Balalıqtan bilem.
Meni yaqqan
Qayğılarnı
Kimlerge aytayım?
Tek sen,
Bizni yükseklerden
Köresiñ her daim…
Ber sen sabır
Doğmuşlarğa,
Maña,
Qomşularğa.
Evimizni
Körmey keçsin
Belâ – qara qarğa.
Her bir evge
Kelsin bahar,
Küzde toylar olsun.
Bu dünyağa
Kelgen ballar
Össin ve büyüsin.
Soqurlar közü
Açılsın.
Sevgenler qavuşsın.
Biri-birine taş atqan
Mıtlaqa barışsın.
Her kün
Namazğa çağırsın
Minareden mazin.
Vatandan
Uzaq qalğanlar
Unutmasın bizni…
Anam avuçlarnı aça –
Rabbim, eşit meni…
Men de
Betim sıypap, qoşam,
Yavaşçıqtan – Amin!
