YAÑI DÜNYA GAZETESİ 100 YAŞINDA!
“Yañı dünya” gazetesi – dünyada tolusınen qırımtatar tilinde neşir etilgen ekane aftalıq gazetedir.
Gazetege 1918 senesi temel qoyuldı. Gazete çeşit yıllarda çeşit adlarnen çıqtı: “Yeni dünya”, “Yañı dünya”, “Qızıl Qırım”, sürgünlikte “Lenin bayragı” , avdetten soñ kene “Yañı dünya”. 100 yıl içinde gazeteniñ urufatı da denişip turgan: başta arap, sonra latin, sonra ise kirill urufatında basıldı. Amma gazeteniñ tili deñişmedi – gazete her vaqıt qırımtatar tilinde basıldı ve basılmaqta. Qırımtatar yazıcı ve jurnalistlerniñ ekserisi “Lenin bayragı”-“Yañı dünya” mektebini kördiler, bu gazetede pişkinleştiler.
Bu künlerde Qırımnıñ paytahtı – Aqmescit şeerinde “Yañı dünya”nıñ 100 yıllıgı munasebetinen «tögerek masa» ve halqara ilmiy-ameliy konferentsiya keçirildi. Bugün ise Qırımtatar akademik muzıkalı-drama teatrinde “Yañı dünya” gazetesiniñ 100 yıllıgına bağışlangan gala-kontsert ötkerildi. Kontsertte «Qırım» ve «Qaytarma» ansamblleri, «Yıldızlar» balalar ansambli, «Selsebil» kemaneciler ansambli, belli yırcı Edip Bagçasaraylı ve digerler çıqışta bulundılar – yubiley tedbirini öz yır ve oyunlarınen yaraştırdılar. Kontsertte “Yañı dünya” gazetesiniñ hadimlerine fahriy yarlıqlar taqdim etildi, olarnın tuvğan til oğrundaki fedakarane hızmetlerine yüksek qıymet kesildi.
Atamız İsmail Gaspralı: «Her şeyniñ başı – oquv, bilgi, edebiy til, milliy matbuat, edebiyattır. Bularsız ne milletni saqlamaq, ne de onıñ inkişafını temin etmek mumkün» degen edi. Onıñ «Terciman» gazetesiniñ devamcısı olgan “Yañı dünya” gazetesini 100 yıllıgı münasebetinen hayırlaymız.
