ZAUR ƏRMUĞAN

Nazim Əhmədli şair-publisist

Kırımın sesi qazetesinin Azərbaycan təmsilçisi

ZAUR ƏRMUĞAN

YURD YERİNDƏNDİR

Oxşamışam yuxusunu,

Nəğməsini, oxusunu.

Tanıyıram qoxusunu,

Bu yarpaq yurd yerindəndir. 

Bir küləklə gəlib bura, 

Bir diləklə gəlib bura, 

Bir ürəklə gəlib bura, 

Bu yarpaq yurd yerindəndir.

Nəfəs-nəfəs əsib, gəlib,

Bağrını daş kəsib gəlib.

Yerdən, göydən küsüb gəlib,

Bu yarpaq yurd yerindəndir.

Həsrətində haray çağlar,

Sinəyə od vurar dağlar.

Gözü yolda qalıb, ağlar,

Bu yarpaq yurd yerindəndir.

GÖZÜ YAŞLA DOYURDULAR

Oda düşdü sarı bülbül,

Yarı alov, yarı bülbül.

Gülüm vardı, xarı-bülbül,

Gülü məndən ayırdılar.

Sındırdılar budağımı,

Kor qoydular bulağımı.

Taladılar ocağımı,

Odu közdən sıyırdılar.

Bitməz çağzız çağlarım, hey!

Çalın-çarpaz dağlarım, hey!

Qan ağlayır dağlarım, hey!

Gözü yaşla doyurdular.

DÜNYA DƏYİRMAN ÇARXI

Bir dəyirman çarxıdır dünya,

fırlanıb dolanar.

Suyu öz əlində

lillənib bulanar.

Baş ağrıdar çax-çaxı.

İnadıyla öyünər.

Yola salar neçə səni, 

neçə məni.

Əzib, əzib daş altında,

üyüdər

dünya.

PAYIZ DUASI

Pəncərələrindən süzülən yağış damlaları 

ağır notlarıdır payız tənhalığının,

oxunur oxunduqca

hər yuva içində.

Küləklə əlbəyaxadır yarpaqlar,

qırılıb budağından

qovuşur torpağa

ömürlə ölüm arasındakı

bir dava içində.

Rənglər rənglərə sarınıb,

soyuq kimsəsizlik əsir

bu hava içində.

Payızın əlləri yapışıb

Tanrı ətəyindən 

ümidsizlikdən çıxmağa.

Sükut-sükut dinir payız

göynədikcə için-için

lal dua içində.