YAVURLARDAN HALQNI SAQLA, ÇANAQQALE
Çanaqqale savaşınıñ 100 yıllığına
Kene bugün ortalıqqa çökken zulmat,
Kene sarğan Vatanımnı manqurt afat,
Biñ asırlıq mecalımız olmaz berbat,
Duşmanlardan halqnı saqla, Çanaqqale!
Közyaşlardan qurumağan yurt toprağım,
Hırpalanğan aziz yerim, Çatırdağım,
Tiken tolu Hansaraynıñ bağça- bağı,
Yabanlardan bağnı saqla, Çanaqqale!
Birge oldıq, birge küldik, birge öldik,
İç bir zaman ayaq altı olmaz er Türk,
Büyük şanı, qurucısı bu Atatürk!
Aqsızlardan halqnı saqla, Çanaqqale!
Lâle açar şeitlerniñ aqqan qanlar,
Mezarlarda boyun egip sessiz ağlar,
Melâyikeler öpmek içün kökten qonar,
Afatlardan kökni saqla, Çanaqqale!
Kelinlerniñ yaslı qalğan al duvağın,
Analarnıñ közyaşların, ai-zarın,
Balalarnıñ ümüt bergen lâlezarın,
Cefalardan qurtar, saqla, Çanaqqale!
Al bayrağın, şeitlerniñ aqqan kanın,
Ay yıldızlı askerlerniñ saf vicdanın,
Altaylardan Avroppağa – haq meydanın,
Türküñ Turan ilin saqla, Çanaqqale!
Bütün yerni sarğan büyük Turanım bar,
Ecdatlarnıñ mecalında mecalım bar,
İzin basıp arttan kelgen askeriñ bar,
Namertlerden yerni saqla, Çanaqqale!
Haq yolunı soñ nefeste şeit sağlar,
Türküm diye şeit qatar türk, em tatar,
Türk birligin qurtarır o, tevhid tutar,
Yavurlardan halqnı saqla, Çanaqqale!
emine usein
