Qırım talebeleri “Qırımda İslâm tarihı. Qırım hanlarınıñ tarihı” yarışında iştirak ettiler
Aqmescit rayonınıñ №2 Mirnoye mektebinde “Qırımda İslâm tarihı. Qırım hanlarınıñ tarihı” yarışı olıp keçti.
Onlayn yarışta rayonnıñ 27 mektebinden 200 talebe iştirak etti.
Yarış teşkilâtçıcı – Qırım Cumhuriyeti ve Sevastopol şeeri musulmanları diniy idaresi. Qırım Cumhuriyetiniñ tahsil, ilim ve yaşlar nazirligi, Aqmescit rayon memuriyeti ve Mirnoye orta umumtahsil mektebiniñ memuriyeti yarışnıñ destekçileri oldılar.
Yarışnıñ müellifi ve teşkilâtçısı – tarihçı, cemaat erbabı Reşat Osmanov.
Yarış eki qısımdan ibaret oldı – yazılı testler ve onlayn viktorina. Yarışçılarnıñ bilgilerine jüri qıymet kesti. Jüri terkibine Qırım Müftisiniñ muavinleri Ayder İsmailov ve Raim Ğafarov, Qırım Cumhuriyetiniñ tahsil, ilim ve yaşlar naziriniñ muavini Timur Asanov ve rayonnıñ tahsil bölüginiñ temsilcileri kirdiler.
Böyleliknen, yarışnıñ birinci basamağında №2 Mirnoye mektebiniñ talebesi Aliye Asan-Usta ğalip oldı, o, eñ yüksek baalarnı qazandı. Güzel bilgi derecesini Trudovoye mektebiniñ talebesi Tamila Kerimova, Çistenkoye mektebiniñ talebesi Hamida Ayedinova ve №3 Qurman mektep-gimnaziyanıñ talebesi Esmer Abibullayev kösterdiler.
Onlayn viktorinada güzel bilgilerni Denisovka, Dobroye, Kölçugino mektepleri ve №3 Qurman mektep-gimnaziyanıñ talebeleri numayış ettiler. Ğaliplerge fahriy yarlıqlar ve qıymetli bahşışlar berildi.
Qırım Müftisiniñ muavini Ayder İsmailov talebelerge yarışta iştirak etkenleri içün teşekkürler bildirdi ve Qırım Müftisi hacı Emirali Ablayev adından yarışnı teşkil etkenlerge destek sözlerini ve minnetdarlığını bildirdi.
“Dünya cemiyeti İslâmğa qarşı teşviqat alıp barılğan alda bulunğanı zaman böyle tedbirler barışıqlıq, merhametlik, qomşular arasında eyi munasebetler kibi kerçek qıymetlerni açıqlay. İşbu tedbir – yaş nesilniñ maneviy- ahlâqiy terbiyesine salmaqlı isseni qoşa. Yüce Rabbimiz er birimizge eyi işlerinde yardımcı olsun”, – dedi Ayder İsmailov.
Bundan da ğayrı, o, qoştı ki, Qırım Müftiligi daima böyle tedbirlerge destek kösterecek.
“Qırımda İslâm tarihı. Qırım hanlarınıñ tarihı” yarışı altıncı kere keçirile. Bu vaqıt devamında yarışta Qurman, Aqmescit ve Canköy rayonlarınıñ mektepleri iştirak etti. İleride ise, tedbirni Bağçasaray rayonı ve Aqyar şeeriniñ mektepleri arasında keçirmege planlaştırıla.
QMDİ matbuat hızmeti
