Qırım musulmanlarınıñ Müftisi hacı Emirali ABLAYEV Oraza bayramı hayırlı olsun!

Sayğılı müminler, qıymetli vatandaşlar!
Bugün bütün musulman alemi büyük bayram – Oraza bayramını qayd ete.
Mına, Ramazan ayı da yekünlendi, biz bir ay devamında oraza tuttıq, dualar ettik, biri-birimizge qoltuttıq.
Teessüf ki, koronavirus pandemiyası sebebinden Ramazan ayını evelki yıllardaki kibi keçirip olamadıq, lâkin er şey Allahtandır. Ümüt etem ki, biz tezden, evelki tertipke qaytırmız, bayram namazları, cuma namazlarını beraberlikte qılarmız ve, Allah qısmet etse, Qurban bayramında artıq bütün camilerimiz namazğa kelgen musulmanlarnen tolu olur.
Oraza bayramı – bizim eñ sevimli bayramlarımızdan biridir. Bu bayram – biri-birimizni qayğıruv, ürmet etüv bayramıdır. İnsan bu dünyağa ne içün kelgenini, ne iş becergenini, ömüriniñ manası nede ekenini er vaqıt tüşünmek borclu. Böylece, Ramazan ayı – qadriyetlerimiz üzerinde tüşünüv, tefekkür, samimiy dualar ayıdır. Yüce Rabbimiz tutqan orazalarımıznı qabul etsin. Çeşit sebeplerden ötrü oraza tutıp olamağan insanlarnıñ ise Allah qalplerini açsın, olarğa sabır, quvet ve selâmetlik bağışlasın.
Bu yıl bayramımız biraz başqaca keçecek, lâkin bizim dualarımız, ibadetlerimiz devam ete.
Barsın, bu bayram quvanç ve sevinç içün bir vesile olsun, Allahu-Tealâ bizlerni ve yaqınlarımıznı, halqımıznı bütün dünyanı sarıp alğan belâdan qorçalasın! Bugün biz büyük bayramnı qarşılar ekenmiz, bizim diqqatımızğa, yardım ve qayğıruvımızğa muhtac olğan kimselerni unutmayıq.
Ramazan ayında muhtac insanlarğa yardım elini uzatqan, yanındakilerni qayğırğan, mecruhlarğa, yetim-yesirlerge, qartlarğa qoltutqan er bir insanğa Rabbimiz savaplar yazsın. Ögümizdeki Qurban bayramını beraberlikte qayd ete bilmemiz içün Allahqa yalvarayıq, Ramazanda qazanğanımız qıymet ve güzelliklerni ömürimizge yaydırayıq. Bizni Ramazanğa qavuştırğan ve oraza tutmağa fursat bergen Rabbimizge soñsuz şükürler olsun. Yüce Rabbimiz tutqan orazalarımıznı ve Ramazan boyunca yapqan hayırlı işlerimizni qabul etsin! Bir seneden kelecek Ramazan ayına sağ-selâmet olıp, bütün ümmet-i Muhammedni qavuştırsın.


hacı Emirali ABLAYEV, Qırım musulmanlarınıñ Müftisi

Bir cevap yazın

E-posta hesabınız yayımlanmayacak.

Pin It on Pinterest