Qırım İmam Maturidiy, Qalay islâmiy ilimler medresesinde hafızlıq diplomı berildi

İmam Maturidiy adına Qalay islâmiy ilimler medresesiniñ hafızlıq bölüginde medrese talebesi Yahya İbragimovğa tantanalı muitte hafızlıq diplomı berildi.

Tedbirde Qırım Muftisiniñ muavini Raim Ğafarov ishtirak etti. O, Qırım Muftisi hacı Emirali Ablayev adından talebeni qazanğan diplomı ve şerefli hafız unvanınen hayırlap, bilgilerini Allah yolunda hızmet içün, milletniñ, tuvğan topraqnıñ inkişafı içün qullanmağa tiledi.

«Qırımda böyle lâyıq yaşlar olğanına quvanamız. Hafız – çoq şerefli bir unvandır, hafızlar Qurannı saqlamaq içün Allah tarafından saylanğan kişilerdir. Bu bizler içün, qorantası içün büyük quvançtır ve men Qırım Muftisi adından medrese rehberligine, bilgi bergen ocalarğa ve Yahya İbragimovnıñ babasına, oğluna doğru terbiye bergeni içün teşekkür bildirmege isteyim. Allah oña eyilik bersin. Yüce Allah er bir talebemizge böyle derecelerge yükselmege yardımcı olsuñ, – dedi Raim Ğafarov.

Hatırlatamız, Yahya İbragimov hafız unvanını 2020 senesiniñ fevral ayında aldı. Bir yarım yıl devamında o, bilgilerini pekitti – Quran ezberini tekrarladı. İhtisas attestatsiyasından soñ, Yahya hafızlıq diplomına nail oldı ve Qırım ve Sevastopol Muftisi hacı Emirali Ablayev adından qıymetli bahşış – umrege barıp kelmek içün sertifikatny elde etti. Musulmanlar içün muqaddes sayılğan yerlerge, – Mekkege ve Medinege Yahya 18 yaşını toldurğan soñ baracaq.

Tedbirde iştirak etken talebeler Qurannıñ ezberden ögrenilüviniñ ve hafız derecesiniñ muimligi aqqında suhbetni diñlediler.

Hafız – Qurannı saqlap qorçalağan insandır, onı baştan soñuna qadar ezberlegen ve oña köre yaşamağa tırışqan, böylece, maneviy ceetten yüksek derecege yükselgen bir musulmandır.

Qırım İmam Maturidiy, Qalay islâmiy ilimler medresesi

Qırım MDİ matbuat hızmeti

Pin It on Pinterest