Qırım Aqmescitte Bütün Dünya hicap künü qayd etildi (Başını örten kadınlar )
Qırım musulmanları diniy idaresinde Bütündünya hicap kününe bağışlanğan tantanalı tedbir olıp keçti. Teşkilâtçılar musafirler içün meraqlı programma azırladılar.
Merasimge 14 yaşından başlap, 70 yaşına qadar 50-ge yaqın qadın-qız keldi.
Müftilikniñ konferentsiya zalında hicapnıñ tarihı añlatıldı, ilâhiyatçı ve ruhiyatçı Zeyneb Bairova hicapnıñ maqsadı ve er bir musulman qadınnıñ ömürinde ne qadar müim missiyanı teşkil etkeni aqqında tarif etti.
Stilist Elmaz Ametova zemaneviy musulman qadınnıñ mükemmel garderobını şekillendirmesiniñ sırlarını açtı, musulman modası aleminde muvaffaq olğan qadın insta-blogerler aqqında tarif etti ve siyaset ile medeniyette taqdirge nail olğan musulman hanımlarnıñ misallerini ketirdi.
Cemaat faaliyetçisi Niyara Beyt çıqışında qorantada, evde qadınnıñ estetik medeniyetiniñ müimligini qayd etti.
“Hicabımnıñ ikâyesi” fleşmobı çerçivesinde Kezlev regionından kelgen bir musafir çıqışta bulundı, o, öz ikâyesini añlattı ve İslâm temellerini ögrenmege isteginde oña kösterilgen destek içün teşekkür bildirdi.
Tedbir devamında qırımtatar milliy urbası ve qırımlı musulman qadınnıñ baş kiyiminiñ deñişmesi aqqında film kösterildi, şiirler aytıldı ve diniy muzıkalı eserler yañğıradı.
Bütündünya hicap künü dünyada 2013 senesinden, Qırımda ise, 2016 senesinden başlap qayd etile. Er yıl içtimaiy ağlarda “Hicabımnıñ ikâyesi” adlı fleşmoblar keçirile, mında qadınlar öz ikâyelerinen paylaşa, farqlı yarışlar, master-klasslar, musulman modasınıñ ve kosmetika saasında elâl yañılıqlarnıñ numayışı ötkerile.
Tedbir iştirakçileri ve musafirleri bayram sponsorları ve yardımcıları tarafından taqdim etilgen ediyelerni aldılar. Bahşışlar kosmetologiya hızmetler ve musulman kiyimlerini almaq içün sertifikatlardan ibaret edi.
QMDİ matbuat hızmeti
