Oraza Ayı Qayırlı Bolsın
Dünya Qırımtatar Derneği mübarek Oraza (Ramazan) ayını qayırlay
‘’Aziz milletimiz! Allahu Tealâğa çoq şükürler olsun ki, tınç kök kübe astında Ramazan-ı şerifke qavuştıq. Yaratıcınıñ emiri ile on bir aynıñ sultanı öz rahmet, mağfiret ve bereket tolu iqlimini bizler içün açar eken, musulmanlarğa oraza tutıp ondan faydalanmaq tüşer!
Aqiqaten, bu ay, ruhlarnıñ ve bedenlerniñ terbiye etilgeni, arınğanı ve yañı bir medeniy seviyege yükselgeni bir vaqıttır. Oraza bir manada zahmettir, amma Allah rizası müjdelengeni içün maneviy inkişafqa çevirile ve qolaylıqnen keçe. Tıpqı bunıñ kibi ayattaki bütün sıqıntı ve qıyınlıqlar yüce bir maqsadqa irişmek yolundaki basamaqlar olaraq tasavvur etilse qolaylıqnen aşılır ve insannı, cemiyetni daa da küçlü yapar.
“Qıyınlıqtan soñra mıtlaqa qolaylıq bardır” degen Yüce Rabbimiz bizlerge sabırlı, azimli ve birlik olmamıznı ögretmektedir.
Öyle ise Quran-i Kerimniñ “Ep birlikte Allahnıñ yipine (dinine) sarılıñız!” çağıruvına sessiz qalmayıq, duşmanlıq ve ayırılıqqa alıp baracaq yollardan saqınayıq. Yüce Mevlâm, ibadetlerimizni tekmil bir şekilde yerine ketirmege bizlerge qısmet eylesin!
Mubarek Ramazan ayını Qırım musulmanları ve qırımtatar halqı içün hayırlarğa vesile qılsın: hastalarğa şifa, dertlilerge derman, ayrı qalğanlarğa tez vaqıtta qavuşmaqlar nasip eylesin!
Allah tutacaq orazalarıñıznı, qılğan namazlarıñıznı, yapqan
dualarıñıznı, bergen sadaqalarıñıznı qabul etsin. Allah epimizge, dünyada
ve ahirette yahşılık bersin, butün yamanlardan qorçalasın, İslâmğa ve musulmanlarğa
yardım etsin, aq yolunda cümlemizni birleştirsin!
Mübarek oraza hayirli olsun!
