MEN SENSİZ KEÇALMAM
Bu qısqa köpürden men sensiz keçalmam,
Töşeme tahtası altından olsa da.
Bir yutum suvumnı men sensiz içalmam,
Etrafım ğarq olup suv ile tolsa da.
Ömürge şefqatnın kölgesi süzülse,
Er zaman men seni dört köznen ararım.
Ogüme güllerden güzeller tizilse,
Men seni olarnın Perisi sanarım.
Ğayretnen tırışıp aslına yetmesem,
Ebediy azaplar canımnı ah-vahlar.
Seni men yoluma yoldaşım etmesem,
Gönlümnı dert biyler, yüreğim qan ağlar.
Bu qısqa köpürden men sensiz keçalmam,
Töşeme tahtası altından olsa da.
Bir yutum suvumnı men sensiz içalmam,
Etrafım ğarq olup suv ile tolsa da.
Yunus TEMİRQAYA
Qırım
Sevimli hanım arkadaşlarımnı bugün kayd etilgen Halqara Qadınlar künü ile hayırlayım. Ömrünüzde daima “Mem sensiz keçalmam” degen bir insan olmasını tileyim.
Zelfira Shukurdzhiyeva
8.03.2020
