Eñ Meşur Qırımtatar Halq Yırlarından Biri – ‘Port-Artur’

PORT-ARTUR (halq yırı) Eñ meşur qırımtatar halq yırlarından biri – ‘Port-Artur’ yırıdır.
Belli ki, 1904–1905 seneleri Rus-Yapon cenki esnasında bir çoq qırımtatar yigitleri de uruşqan. O cenkte tahminen 20 biñ asker, bu cümleden qırımtatarlar da elak olğan. Cenkniñ eñ şiddetli uruşları Port-Artur şeerinde olğan.
İşte, halqımız bu munasebetnen kederli bir yır yaratqan ve bu yır hususan sürgünlik yıllarında namlı yırcımız Fevzi Bilalovnıñ icrasında ğayet popular oldı. Bu türkü bugün de icra etile ve o, qırımtatar halqınıñ sevimli yırlarından biri sayıla.




PORT-ARTUR
Port-Arturnıñ mallesi,
Ne büyüktir qalesi.
Soldat* ketken yaşlarnıñ,
Ağlap qaldı anası.

Ağlama, anam, ağlama, babam,
Belki çare bulunır.
Filcan tolu suvmıdır,
Yapon yolu bumıdır?

Aman, aman, padişaim,
Yapacağım bumudır?
Ağlama, anam, ağlama, babam,
Belki çare bulunır.

Selbi kibi boyumız,
Ağlap qaldı soyumız.
Port-Arturdan qaytqan soñra,
Olur bizim toyumız.
Ağlama, anam, ağlama, babam,
Belki çare bulunır.
*asker


ПОРТ-АРТУР (халкъ йыры) Энъ мешур къырымтатар халкъ йырларындан биреви – ‘Порт-Артур’ йырыдыр.
Белли ки, 1904–1905 сенелери Рус-Япон дженки эснасында бир чокъ къырымтатар йигитлери де урушкъан. О дженкте тахминен 20 бинъ аскер, бу джумледен къырымтатарлар да элак олгъан. Дженкнинъ энъ шиддетли урушлары Порт-Артур шеэринде олгъан.
Иште, халкъымыз бу мунасебетнен кедерли бир йыр яраткъан ве бу йыр хусусан сюргюнлик йылларында намлы йырджымыз Февзи Билаловнынъ иджрасында гъает популар олды. Бу тюркю бугунь де иджра этиле ве о, къырымтатар халкъынынъ севимли йырларындан бири сайыла.

ПОРТ-АРТУР
Порт-Артурнынъ маллеси,
Не буюктир къалеси.
Солдат* кеткен яшларнынъ,
Агълап къалды анасы.

Агълама, анам, агълама, бабам,
Бельки чаре булуныр.
Фильджан толу сувмыдыр,
Япон ёлу бумыдыр?

Аман, аман, падишаим,
Япаджагъым бумудыр?
Агълама, анам, агълама, бабам,
Бельки чаре булуныр.

Сельби киби боюмыз,
Агълап къалды союмыз.
Порт-Артурдан къайткъан сонъра,
Олур бизим тоюмыз.
Агълама, анам, агълама, бабам,
Бельки чаре булуныр.
*аскер

Bir cevap yazın

E-posta hesabınız yayımlanmayacak. Gerekli alanlar * ile işaretlenmişlerdir

Pin It on Pinterest