BAYRAĞIM
Acuvsız oldı zaman, tanımay kimseni,
Her şeyni aldı yavur, alalmay tek seni.
Azat Qırım yurtunı körem men tamğañda,
Halqımnıñ keçmişini kâde bir añğanda.
Kerekmey, kerekmey, maña başqa bayraqlar,
Hepisi menimki degil, menden uzaqlar.
Bir ricam, tilegim, istegim bar Tañrıdan –
Yurtumız, bayrağımız canlansın yañıdan.
Bayrağım – ay yarığım, sensiz men esirim,
Elimden tüşseñ bir kün, af etmez nesilim.
Tatarlıq degende, sen aqlıma kelesiñ,
Bayrağın sevmegenge men derim “delisiñ”.
Büyük halq, büyük millet, kök bayraq saibi,
Bayrağıñ dalğalansın, bunıñ yoq ayıbı.
“Bal tamçıdan cıyılır”, cıyıl sen Vatanda,
Asıl milliy devletiñ tiklensin yañıdan.
Seyran SULEYMAN
