GenelGüncelKültür Sanat

Allah bizge kendimizni diñlemek içün bir fırsat bere! Qıyamet bardır ki …

Ey, insanlar! Rabbiñizden qorqıñız!
Zira qıyamet kününiñ zelzelesi – deşetli şeydir.
Kurannıñ Hacc suresinden

Yaradan – Allahım ğayret eyledi,
Bir boşluq bar edi, qısmet eyledi,
Yaratıp dünyanı nimet eyledi,
Nimetler bardır ki, yoq qadir-qıymet.

Yaralar olmazsa, kimse tuz sepmey,
Göñülde teselli – boştır, is etmey,
Çeçekke sırların açmaq istemey,
Duyğular bardır ki, yoq qayğı-asret.

Bülbuller evine qarğalar qona,
Küflengen ötmekday selâm ufana,
Güllerniñ yuvası bağ degil – sana,
Selâmlar bardır ki, yoqtır selâmet.

Sağırday, soqurday bizim alımız,
İşançsız nasiat almay añımız,
Qurannıñ sözüne muhtac aqlımız,
Mollalar bardır ki, yoqtır hitabet.

Babası oğluna bugün inanmay,
İkmetsiz qaynana, kelin dayanmay,
Ruhsızlıq kösterip yaşlar utanmay,
Yuvalar bardır ki, yoq samimiyet.

Qapular qapanıq hoşçün açılmay,
Qomşu qomşunı istemey, tanımay,
Kibbarlıq köstere, selâmın almay,
Qomşular bardır ki, yoq medeniyet.

Tikenler bermedi ğonce-gülüni,
Boş satır buzlata qalbni-göñülni,
İnenen qazamay teren quyunı,
Şairler bardır ki, yoq şiiriyet.

Aşıqlar Ümerniñ tacını taqmay,
Peyğamber adına ilâhiy aytmay,
Tek cepke o baqa, közüne baqmay,
Aşıqlar bardır ki, yoqtır saadet.

Alimler sarf etmey Haqçün añını,
Parağa alalar ikmet namını,
Oqumay ve bilmey aq Quranını,
Alimler bardır ki , yoq bilgi-ikmet.

Gippokrat “ant”tından inkâr etkenler,
Devağa iç ümüt bermey – biçkenler.
Ürmetni degil de, para seçkenler,
Ekimler bardır ki, yoq elâl-hızmet.

Çobannıñ sırtına ağır yük yükley.
Aqqını bermekçün ep ruşvet bekley,
Aqsızlar, hırsızlar cezasın çekmey,
Akimiyet bar ki, yoqtır adalet.

Elbet de, tac ve taht onıñ qolunda,
Yalanlar, yañlışlar onıñ añında,
Hayırsız emirler onıñ yolunda,
Padişa bardır ki, yoq tüzgün devlet.

Biz toqmız, Somalide aç qala evlâd,
Bizde şeñlik bar, Filistinde – feryad,
Buña yürek dayana raat-raat,
Yürekler bardır ki, yoqtır merhamet.

Merhamet yerine zulumnı oplay,
Zeerni akrepday nefretçün toplay,
Namerdniñ kölgesi dünyanı qaplay,
İnsanlar bardır ki, yoq insaniyet.

Bu dünya da endi bizge az oldı,
Nefishor insanğa mezar qazıldı.
Allah nimetleri bugün toz oldı,
Qıyamet bardır ki, yoqtır Nedamet!

emine üsein

Kırım'ın Sesi Gazetesi

27 Şubat 2015 Tarihinde hizmet bermege başlağan www.kiriminsesigazetesi.com maqsadı akkında açıklama yapqan Mustafa Sarıkamış İsmail Bey Gaspıralı’nıñ bu büyük mirasına sahip çıqmaq ve onun emellerini yaşatmaqtır. Qırımtatar Türkleriniñ ananevî, körenek, ürf, adet kibi yaşamlarında ne bar ise objektif şekilde Dünya cemiyetine taqdim etilmektir.

Pin It on Pinterest