Edem Nalbandov qırımtatar bestekâr ve çalğıcısı

2 Mart 2019 Kırım'ın Sesi Gazetesi

Edem Nalbandov, 1926 senesinde Qırımnıñ Qarasuvbazar şeerinde doğdı. Balalığı Qarasuvbazarda keçken Edem Nalbandov cıyğan paralarınen özüne bir mandolin aldı. Lâkin onıñ çalğıcı olğanına razı kelmegen babası mandolinni sındırdı. Bir vaqıt soñra drama cemiyetine qoşuldı. Bu cemiyette keman çalmanı ögrendi. En soñunda babası onıñ muzıka sevgisine razı oldı. Oña balalayka, keman ve mandolin aldı. Edem Nalbandov ilk mektepnen beraber muzıka mektebiniñ keman sınıfında oqudı.

1945-de muzıka ocalığına başladı. 1948-de Yoşkar Ola şeerinde (Rusiyeniñ Çirmiş Cumhuriyeti) filarmoniya hor çalğıcısı oldı. 1950-de muzıka mektebiniñ bestekâr bölügine kirdi. 1956-da Tacikistanda Leninabad muzıka mektebniñ bitirip, aynı mektepte oca oldı. 1957 de Taşkent Devlet Konservatoriyasına qabul etildi. 1962-de hor idareciligi bölümini tamamladı. Bir qaç sene Qaytarma Ansambliniñ baş idarecisi oldı. Halq yırlarnıñ hor içün yañıdan işledi. Tañ Yıldızı, Ay Nenni, Horan adlı halq yırları Özbekistan Radio Televizion horu tarafından aytılıp plaqqa qayd etildi. Qırımtatar şairlerniñ doquz eserinden bestelengen Bir Top Gül (1979), hor içün bestelengen yırlar Baht Yıldızı (1985), kene qırımtatar şairlerniñ sözlerine bestelengen Sümbül Taşkentte yayınlandı.