Bir İzin Beriñiz, Yurtuma Qaytayım!- Riza YUSUF (Bekir ÇOBAN-ZADE)
Bir izin beriñiz, yurtuma qaytayım!
Yurtuma qaytayım, dertimni aytayım!
Batıdan keliyim qanatım açıp
Suvuğan yürekke ateşler saçıp…
Ne mırza soyumda, aytuvlı bir bay,
Babam bir çoban, anam Zaydabay…
Bir izin beriñiz, baqırıp kiriyim,
Qırımda, Qaşğarda ökürip cüriyim…
Bir boran yasayım tınç Tatar çölünde,
Mollanıñ, qaranıñ qayğısız göñlünde…
Bir izin istiymen tuydurmay barayım,
Saraylar içine azğana qarayım;
Betleri qırmızı, moyunı qalın
Baylarğa aytayım, ne saqlay yarın…
Ölümniñ tüsüday bolur tüsleri…
Buruşır, moğayır o maylı yüzleri…
Bir izin beriñiz, o közü caşlı,
Cüregi suvuğan, biçimsiz başlı
Köylüge aytayım özüniñ tilinden,
Qoparıp beriyim bilginiñ gülünden…
Nurlanır şimdiki qaruvsız közü,
Bir arslan kesilir, yarlıqtır sözü..
Bir izin tiliymen, baqırıp kiriyim,
Qırımda, Qaşğarda Curtum dep cüriyim…
Bekir ÇOBAN-ZADE
Budapeşt, 1919 s.
