«Ukraina-AB» Sammitiniñ Yekünleyici beyanatında Qırım mevzusı
‘‘Ukraina-AB’’ XX-nci Sammitinde 2018 senesi oraq ayı (iyül) 9 künü qabul etilgen Yekünleyici beyanatnıñ ‘‘Rusiye – istilâcı devlet’’ serlevalı 8-nci bölügünde Rusiyeniñ Silâlı quvetleri 2014 senesi kiçik (fevral) ayında başlağan tecavüz neticesinde Ukrainanıñ egemenligi ve topraq bütünligi açıq-aydın bozulğanı eñ sert şekilde takbih etile. Yekünleyici beyanatta Qırım MC ve Aqyar şeerini qanunsız işğal etmek ıntıluvlar ve yarımadada ‘‘saylavlarnıñ’’ keçirilüvi bir kere daa takbih etile, insan aqları saasında vaziyet beterleşkeni qayd etile. Bundan da ğayrı, Yekünleyici beyanatta Ukrainadan ruhset almadan Keriç boğazında köpürniñ quruluvı, Qırım yarımadası, Qara ve Azaq deñizleri arbiyleştirilüviniñ devam etmesi takbih etile.Yekünleyici beyanatta Avropa Birligi Qırımnı işğal etmek ıntıluvlarnı tanımamaq siyasetini, bu cümleden, sıñırlayıcı tedbirler olğan sanktiyalarnı devam ettirecegini qayd etti. Beyanat Rusiye Federatsıyasını Ukraina ükümetiniñ nezaretinden vaqtınca çıqarılğan topraqlarğa, bu cümleden Qırımğa halqara teşkilâtlarnıñ, bu cümleden, AHIT-nıñ mahsus nezaret etici taqımnıñ irişimine ruhset bermege, halqara qumanitar uquqnı ürmet etmege, em de Rusiyede ve Qırımda yaqalanğan bütün ukrain vatandaşlarnı, bu cümleden qırımtatar faallerni ve Oleg Sentsovnı, Volodımır Baluhnı, Oleksandr Kolçenkonı, Stanislav Klıhnı, Oleksandr Şumkovnı, Roman Suşçenkonı deral azat etmege çağıra. Ukraina ise Sammitte Qırım MC ve Aqyar şeerini qanunsız işğal etmek ıntıluvlarınıñ menfiy tesirlerine qarşılıq kösterüv olaraq halqara meydançıqlarda yapqan areketlerini taqdim etti.
