GenelGüncelKültür Sanat

SERVER KAKURA

Server Kakura 1960 senesi mayıs 13-te Özbekstannıñ Andican velayeti, Baytaq qasabasında doğdı. 1979 senesi Taşkent Devlet konservatoriyası yanındaki opera studiyası orkestri erkânında artist olaraq kendi iş faaliyetini başladı. O, 1984 – 1987 seneleri, qabiliyetli balalar içün  ihtisaslaştırılğan muzıka internatında oca çalıştı, anda da balalar ansamblini meydanğa ketirdi. Bunıñle bir sırada o, 1985 senesi Andican şeerinde “Dostlıq” namında vokal çalğı aletleri ansamblini teşkil ete. 1988 sensi Qırımğa qayta ve “Tavriya” adına Ukraina Devlet vokal-horeografiya ansamblinde ve aynı zamanda bir sanlı Aqmescid (Simferopol) muzıka mektebinde nefesli çalğı aletleri sınıfı boyunca oca çalışa. Şu senesi de, Qırımda ilki olaraq, “Fidanlar”  adına balalar ansamblini yarata.      Server Kakura 1992 senesinden bu künge qadar Profsoyuzlar medeniyet evindeki “Teselli” ansambline yolbaşçılıq yapıp kelmekte. 1990 senesi “Qırım” adına qırımtatar folklor ansambli teşkil olunğan soñ o, onıñ em muzıka reberi, em de baş direktorı vazifelerinde bulunmaqta. Ansamblniñ esas maqsadı, qırım milliy sanaatnı yañıdın canlandırmaq ve inkişaf yapmaqtan ibarettir.     Server Kakura ansambl ile beraber Almaniya, Belgiya,Gollandiya, Romaniya, Türkiye, Belorusiye  memleketleri boylap gastrollerde bulundı. Ansambl Bursa ve Samsun (Türkiye) şeerlerinde olıp keçken halqara festivalleri Laureatı degen unvanğa nail oldı. Bundan ğayrı, ansambl, defalarca Ukraina paytahtı Kiyev şeerinde qırımtatar sanaatını taqdim etti.     Server Kakura 1976 seneden itibaren muzıka yaza. O çeşit şekil ve janrda yazılğan bir talay muzıka eserleriniñ müellifidir. 1991 senesinden itibaren Qırım, soñra Bütünukraina muzıka birliginiñ azası. 1994 senesi Bütünqırım kompozitorları yarışınıñ ğalibi ola. Onıñ “Vatanım Qırım” serlevalı kitabı, “Seviñiz, seviliñiz” namında video-albomı ve Ablâziz Veliyev ile  müelliflikte çıqqan “Muacir türküleri” adına cıyıntıqları dünya yüzüni kördi.     Server Kakura 1998 senesi “Altın taliy” (“Zolotaya fortuna”) denilgen Bütünukraina tedbiri Laureatı unvanına saip oldı. 1999 senesi oña Ukrainada hızmet köstergen sanaat erbabı unvanı taqdim etildi. 2002 senesiniñ iyün ayında “Tatarstan Cumhuriyetinde Qırım Muhtar Cumhuriyetiniñ Medeniyet künleri” çerçivesinde keçirilgen festival büyük medeniy  emiyetke malik oldı. İşte, Server Kakura mezkür festival teşkilâtçılarından biri edi. Er eki cumhuriyetler arasındaki medeniyet alâqaları inkişafında ve pekinüvinde köstergen ayrıca hızmetleri içün o, Tatarstan Cumhuriyetinde hızmet köstergen sanaat erbabı kibi yüksek unvanğa malik oldı.     Şunı da qayd etmeli ki, Server Kakuranıñ icadı qırımtatarlar ile sıqı bağlıdır. O bir sıra spektakllerge yazılğan muzıkalarnıñ müellifidir.     2004 senesi dekabr ayında, İstanbul şeeri medeniyet merkeziniñ teşebbüsile, Qırımtatar medeniyet künleri keçirildi. Oña bediy reber olaraq Server Kakura tain etildi. Bundan ğayrı o “Tepreç”, “Qırım aqşamları” kibi milliy ananeviy bayramlarnıñ,  kontsertlerniñ em de Türkiye ve Qırımda alınıp barılğan metin (populâr) televizion yayınlarınıñ daimiy iştirakçisidir.      Belli kompozitor Server Kakura, endi çoq yıllardan berli em qırımtatar, em de diger millet şairleri – söz ustaları ile icadiy işbirlikte bulunmaqta. Server Kakurannı icadı muzıka mütehassısları tarafından yüksek qıymet kesilip kelinmekte. Onıñ yaratqan nağmeleri halq tarafından sıcaqlıqle qarşılanıla – sevile. Yırları ise, Qırımnıñ özüne has ziyaretnamesidir

Memva vizitnaya kartoçka

Anaurt.com

Kırım'ın Sesi Gazetesi

27 Şubat 2015 Tarihinde hizmet bermege başlağan www.kiriminsesigazetesi.com maqsadı akkında açıklama yapqan Mustafa Sarıkamış İsmail Bey Gaspıralı’nıñ bu büyük mirasına sahip çıqmaq ve onun emellerini yaşatmaqtır. Qırımtatar Türkleriniñ ananevî, körenek, ürf, adet kibi yaşamlarında ne bar ise objektif şekilde Dünya cemiyetine taqdim etilmektir.

Pin It on Pinterest