Şair Bəhram Bilaloğlu

Şəhid Anası

Hardasa bir “Ana” boynu bükülü,

Fəryad qopararaq “övlad” istəyir.

Daha qalmayıbdır,onun ümidi,

Qəlbində dağ boyda,kədər bəsləyir.

Pənah aparıram, Rəbbimə “Ana”,

Qaytarsın oğlunu, cismən yanına.

Ədalət bilməyən, naxələf,nankor,

Hardan inansın ki,sənin ahına.

Məkanım tanrının yoğurduğu yer,

Yaşayıb bir ömür,geri dönəcəm.

Dünyaya gətirən anam olsa da,

Ayrılıb anamdan,vaxtsız sönəcəm.

Hisslərin incidir, qocaldır səni,

Sanma ki, övladın görməyir daha.

Hələ çatmamısan, körpü sirata,

Ağlama,qoymaz ki şəhidin tənha.

*****

                ƏSGƏR

Yatmış düşmənimiz,mənfur oyandı

İçdilər əsgərlər,məhv etmək andı

Düşmənlər al-qana,çirkə boyandı

Yaşa- yaşadıqca, qalx-əsgər yaşa!

Cəhənnəm oduna məhkumsan- məhkum

Tanıyır dünya da dünyaya məlum

Bizim əsgərdir ki,doğulur məsum

Yaşa- yaşadıqca, igid,ər yaşa!

Gücün hünərin də bəllidir- bəlli

Qorxdu murdar düşmən, vurdun tək əlli

Gözlərin görmədi yalvaran əli

Yaşa- yaşadıqca, cəngavər yaşa!

Əssin dalğalansın şanlı bayrağım

Yaşasın müqəddəs uca torpağım

Bir də qayıtmasın yalın ayağım

Yaşa- yaşadıqca, bəxtiyar yaşa!

*****

                  Şəhidlər

Vətənin yolunda canından keçən

Şəhadət şərbətin,suyundan içən

Düşməni məhv edən,ordusun biçən

Yüksək məqamlara çatandır,şəhid!

Adıyla bağlıdır,neçə şəhər də

Yaşayır daima, xatirələrdə

Qanıyla yoğrulan,belə təhərdə

Vətəni insana, qatandır,şəhid!

Keçmisən tanrının verdiyi candan

Alıb intiqamı, torpaq da qandan

Cənnətə kökləndin həmin zamandan

Şirin canın verən,satandır, şəhid!

Bölünməz qaladır aldığın torpaq

Ruhuna möhtacdır, hər əsən yarpaq

Olmusan sahibi,kim olar ortaq.

Müqəddəs zirvədə, yatandır,şəhid!

*****

                 Şəhidim

Salam yetir bizdən, behişt əhlinə,

Gecələr yuxu da pay gətir bizə.

Ruhuna baxaraq dincəlsin ruhlar,

Geriyə dönəndə, düşək biz izə.

Torpağı ucaldan şəhid qanıdır,

Tökülür üstünə adlanır Vətən.

Paltarı şəhadət qanı qoxuyan,

Cənnətə gedişin- mübarək,əhsən.

Unudulmaz oldun,neçə qəlblərdə,

Səsin tez ucaldı xudayi ərşə.

Ağladı sevənlər,sənsiz günlərə,

Əbədi bax getdin üzü behiştə.

*****

         VƏTƏN HƏSRƏTİ

“Xudafərin” adı vardır üstündə,

Adamlara izin ver ki keçsinlər.

Həsrətə son qoysun, ayrı düşənlər,

Arazdan bir yerdə pak su içsinlər.

Yarısı o tayda,yarı bu tayda,

İsitmir qəlbləri,soyudur ancaq.

Yurduna bağlılıq olan xalqlarda,

Bitməz ki bu sevda,sevilər torpaq.

Urmiya quruyur,böyükdür dərdim,

Allaha ucalır əsən əllərim.

İkiyə bölünməz mənim vətənim,

Yaşasın,dirçəlsin, oba-ellərim.

Qərib şəhərlərim çatsın arzuya,

Oyansın içində,ülvi məhəbbət.

Kimlər istəməzsə sülhü qərarı,

Asın çarmıxına olsun bu ibrət.