Qırım musulmanları Beraat gecesini qarşılaycaqlar

Bütün dünya musulmanları “günahlardan arınuv” ya da “günahlar afu etilgeni gece” olaraq bilingen Beraat gecesini qayd etecekler. O, Qadir gecesinden soñ eñ müim mubarek gecelerden biri sayıla.

Bu gece Qırım musulmanları keçmişleri içün dua oquy, günahlarnıñ afu etilmesini soray, namaz qıla ve Allahnıñ razılığını qazanmaq içün savaplı işler yapalar. Allahtan dualarnıñ qabul etilmesini, bizni günahlardan ve yaman asletlerden temizlemesini, er kesniñ Qırımnıñ epidemiyalardan, hastalıqlardan qurtulması ve, sağlıqlı olıp, Ramazan ayına birlikte kirmemiz içün dua etmesini tileymiz.

Günahlar afu etilgen Beraat gecesi hicriy musalman ay esaslı taqviminiñ Şaban ayında, 14-15 künleri arasındaki gecede qayd etile.

Quran ayetine esasen, musulmanlar aynı bu gecede Allahnıñ er kesniñ taqdirini, dualarını esapqa alıp, belgilegenine inanalar.

Beraat gecesi aqqındaki hadislerde Şaban ayınıñ 15 gecesi kelgende, onı dualarnen keçirmek, ondan soñ kelgen künde ise, oraza tutmaq teşviq etile. Allah bu gece: “Afu istegen yoqmı, onı afu eteyim. Malını ve sağlığını arttırmağa istegen yoqmı, oña bereyim”, – dep, soray. Ve bu al sabağa qadar devam ete.

Beraat gecesinde Quran-ı Kerim Levh-i Mahfuzdan dünya semasına endirilgen edi. Quranğa esasen, Levh-i Mahfuz – bütün muqaddes kitaplarnıñ menbasıdır, anda bütün keçken ve kelecek ameller yazılı. Bu saqlı ve qorçalanğan levha ilâhiy ilimni temsil etip, qadernen sıqı bağlıdır.