Qırım Müftisi Hansaraydaki vaziyetnen tanış oldı
Qırım Müftisi hacı Emirali Ablayev Hanlar sarayında peyda olğan vaziyetnen tanış olmaq içün Bağçasaray şeerine barıp keldi. Anda Qırım musulmanlarınıñ diniy yetekçisi qurucılarnıñ topraq işlerini yapqanlarından sebep Bağçasaray tarihiy-medeniy ve arheologik müzey-qoruqnıñ memuriy binasınıñ divarında büyük çatlaqlar peyda olğan yerlerini baqıp çıqtı. İşbu çatlaqlar bütün memuriy binanıñ avdarıla bilecegini açıqtan köstere.
Qırım Müftisi hacı Emirali Ablayevniñ fikirine köre, peyda olğan vaziyetniñ qarşısını almaq içün Bağçasaray tarihiy-medeniy ve arheologik müzey-qoruğı ile Qırım Cumhuriyetiniñ Medeniyet nazirliginiñ rehberiyetleri yüksek ihtisaslı mütehassıslarnı celp etmek kerek.
Qırım musulmanları diniy idaresi eñ yaqın vaqıtta buña esaslanğan muracaatını Qırım medeniyet nazirligine yollacaq.
“Hanlar sarayı külliyesi – qırımtatar saray mimarcılığınıñ yekâne saqlanıp qalğan obyektidir, onıñ qorunması – bizim umumiy mesülietimizdir. Biz eñ yaqın vaqıtta Qırım medeniyet nazirligine muracaatımıznı yollaycaqmız ki, bugün müzey-qoruqnıñ memuriy binası olaraq qullanılğan saray binasını saqlamaq içün kerekli bütün qararlar alınsın”, – dedi Qırım Müftisi.
