Qırım camilerinde kütleviy ibadetler keçirilüviniñ sıñırlanuvı devam ettirildi

Qırım musulmanları diniy idaresi, Covid-19 (koronavirus) hastalığınıñ darqaluvından sebep şekillengen vaziyet ile alâqalı olaraq, Qırım camilerinde cuma ve cemaat namazlarınıñ, maarif ve tasil tedbirleri keçirilüviniñ toqtatılmasını 2020 senesi, aprel 30 kününe qadar devam ettirgenini bildirdi.

Bundan da ğayrı, Qırım Müftisiniñ emiri ile 2020 senesi, aprel 30 kününe qadar ananeviy diniy tedbirlerniñ – dua, ad qoyuv ve nikâh merasimleriniñ keçirilüvi toqtatıldı. Cenaze namazı ve defin işlevleri mümkün olğanı qadar tez, bütün havfsızlıq qaidelerine riayet etilerek, beden teması ve qol tutuşuvı olmadan keçirilmeli.

İmamlarğa musulmanlarnı yuqarıda añılğan ve diger, cemaat iştirakinen yapıla turğan diniy merasimlerni keçirmekten vazgeçmege çağırmaq ve hastalıqnıñ ögüni alacaq tedbirler aqqında bilgilendirüv işini alıp barmaq buyurıldı.

Qırım Müftisiniñ emiri Qırım Cumhuriyeti ve Sevastopol şeeriniñ bütün saasını içine ala ve 2020 senesi, aprel 30 kününe qadar yürürlikte olacaq. İhtiyacğa köre, emirniñ yürürligi devam ettirilecek.

QMDİ matbuat hızmeti

Bir cevap yazın

E-posta hesabınız yayımlanmayacak. Gerekli alanlar * ile işaretlenmişlerdir

Pin It on Pinterest