Qara kün – Refat ÇAYLAQ

On sekiz mayısta doğğanlar bar bugün,
On sekiz mayısta ölgenler bar bugün.
On sekiz mayısnı unutqan bar bugün,
On sekiz mayıstan qorqqanlar bar bugün.

On sekiz mayısnı qara kün sayğan bar,
Olarçün Qırımda bugün de yollar tar.
Olarğa topraq yoq, ne çöl, yalıda,
Qayerge barmasın, uçurım aldında.

Qırımlar, qırımlar, pek ağır alıñız,
Vatan,dep, topraq, dep,oturma, qalqıñız.
İş qalsa yarınğa, biliñ, keç olacaq,
Milletni kötergen gemimiz batacaq.

On sekiz, Qırımçün eñ qara bir raqam,
O qara kün kelse titreyim, em qorqam.
O qara kün meni bugün de ep eze,
Qapıdan qapığa acımay kezdire.

O qara kün meni bugün de kemire,
O qara kün meni bugün de öldüre.
Bir avuç topraqqa bugün de ihtâcım,
Vatan, dep,Qırım, dep, çaptırğan ilâcım.

Bir cevap yazın

E-posta hesabınız yayımlanmayacak.

Pin It on Pinterest