Poroşenko ”Siziñ aqqıñızda iç bir vaqıt unutmaymız ve sizni azat etmek içün er kün çalışamız”

Prezident Petro Poroşenko Ukraina devletimizniñ işğal etilgen topraqlarında yaşamağa mecbur olğan ukrainalılar aqqında er vaqıt hatırlağanını, olarnı azat etmek içün faaliyetini devam etkenini bildirdi.

”Ukraina quvetlendi, Ukraina öz küçlerinde eminligini numayış etti. Birdemlik Kününde biz Ukraina sıñırları içerisinde, amma vaqtınca işğal etilgen Qırım topraqlarında, Lugansk ve Donetsk vilâyetleriniñ işğal etilgen parçalarında yaşağan semetdeşlerimizge can-göñülden muracaat etemiz. Siziñ aqqıñızda biz iç bir vaqıt unutmaymız. Sizni duşman boyundırığından azat etmek içün biz er kün çalışamız”, – Ukraina Birdemlik künü ve Ukraina Halq Cumhuriyeti ile Garbiy Ukraina Halq Cumhuriyeti arasında birleşüv aqqında añlaşma imzalanmasınıñ 100-yıllığına bağışlanıp keçirilgen tedbirdeki çıqışında dep qayd etti devletimizniñ Başlığı.

Bu maqsatqa irişmemiz içün öz ukrain birligimizni, birdemligimizni epimiz qorçalap quvetleştirmelimiz”, – dep qayd etti Petro Poroşenko.  ”Onıñ içün er kes Ukraina bir devlet tili ile unitar devlet olğanını añlamalı – Ukraina Esas qanunında da böyle yazılğandır.  İç bir türlü federatsiyalar ve mahsus statuslar olmaycaq. Yekâne mustaqil birdemli Ukraina”, – dep ilân etti Prezident.

Devletimizniñ Başlığı Ukraina mustaqil olğanına Kreml razı olmağanını hatırlattı. ”Mustaqilligimiz ilân etilüviniñ ilk künlerinden başlap, Rusiye imperiyasını ğayrıdan tiklemege tırıştılar. Şimdiki tecribemizni esapqa alıp, bunı Ukrainağa qarşı gibrid cenkiniñ başlanuvı olaraq adlandırmağa mümkün. Ukrainanı haritalarda bölgen, devletimizni rus tilli ve ukraina tilli qısımlarına bölgen ukrain siyasetçiler duşmannıñ yardımcıları oldılar. Ordumıznıñ viran etilüvine pervasız baqtılar, iqtisadiyatımıznı yıpratıcı gaz añlaşmalarınen boğmağa yardım ettiler”, – dep qayd etti o.

Prezident aytqanına köre, 2014 senesi Ukraina öz serbestliğini ve mustaqilligini quvetleştirmege başlağan soñ, Avropa Birligi ile NATO-ğa yolunı tutqan soñ kerçek açıq-aydın oldı. ”Bizni bu yoldan saptırmaq içün Moskova Qırımnı işğal etti ve Ukrainanıñ qolay yutulması içün bizni parçalamağa tırıştı. Biz kene de mustaqilligimizni ve birdemligimizni ğayıp etüv telükesine rast keldik”, – dep ayttı Prezident.

”Amma büyük qurbanlar esabına, ukrain halqınıñ qocaman ğayretleri vastasınen biz bu telükeni yeñdik. ”Terroristler, rusiye askerleri ve muntazam rusiye ordusı ile qattı küreşip, biz duşmannı toqtattıq. Şiarımız ise ”Yekâne devlet” edi”, – dep yekünledi Petro Poroşenko.

MENBA : UKRAİNA PREZİDENTİNİÑ QIRIM MUHTAR CUMHURİYETİNDEKİ TEMSİLCİLİGİ

Bir cevap yazın

E-posta hesabınız yayımlanmayacak. Gerekli alanlar * ile işaretlenmişlerdir

Pin It on Pinterest