N E D E N ?

Neden qorqıp qartbabaylar şu Qırım dan qaşqanlar?

Neden urkıp oz Vatannı duşmanlarğa aşqanlar?

Bayır geşıp, bızlar ışıp, başqa topraqlar qarap

Dağılğanlar dort-bır yaqa, asır boyunca cılap!

*****

Dobruca’ğa yerleşkenler “ak topraq” dep, dedeler!

Qırım yaqın, Istanbul da onday yaqın, degenler!

Asret kozmen qartayğanlar, oz koyım dep, Vatanım!

Onlarındır butun dertım, seslerıdır cılavım!

*****

Yıllar geşıp asırlarğa dertnı turmay anlatqan!

Dobruca’nın koylerınde Hayal bolğan artık “Han”!

Medrese de oquğanlar Niyazi men bır seste,

Vatan uşun tırışqanlar, uyan Tatar degende.

*****

Neden qorqıp bırleşmiyler asırların sonunda?

Neden urkup tartışamız duşmanların qolında?

Er tuvgan kun bır fırsattır, qaşırmayıq zamannı

Haqqımıznı bız almasaq, tarih untar Tatarnı!

*****

Nedenketken qartbabaylar şu Qırım dan ayrılıp?

Neşın cılay qartanaylar torunların ostırıp? 

Gurbetlıkte, oksız halde, Tatar halqı oğraşa,

Asırlardır, Tatar halqı, Vatan qarap dolaşa!

*****

Tarihımız onday şanlı, neden qayb bolayıq?

Bastırıqtır qara kunler, neden qorqıp yuqlayıq?

Bır vaqıtta Avrupa nı qamşılağan Atamız,

Unutmasaq o kunlernı, ozımıznı cöytmamız!

                                                                               Guner Akmolla  22 – VII – 1993

Bir cevap yazın

E-posta hesabınız yayımlanmayacak. Gerekli alanlar * ile işaretlenmişlerdir

Pin It on Pinterest