FƏRQANƏ SƏFƏRLİ – Hakim, Şair

Nazım Ahmetli

Kırımınsesi Gazetesi

Azerbaycan Temsilcisi

FƏRQANƏ SƏFƏRLİ

Həkim, şair

 “Dua çərpələngi” və “Avqust laləsi” adlı şeir

 kitablarının müəllifi.

Şeirlər

Gəlirəm

Yerin pis əməlindən

Üşüyürəm, İlahi –

Göydə bir ocaq qala,

Qızınmağa gəlirəm.

         ***

Çiynimdəki hörüklər

Mələklərə yol açıb –

Dəftərimi bilməkçün

Arınmağa gəlirəm.

          ***

Qaranlıq peşimandı,

Qardaş bilib işığı –

Kəfənin iç üzünə

Sarınmağa gəlirəm.

         ***

Biz uçmaq vərdişini

Doğuluşdan itirdik –

Bir kəpənək belində

Barınmağa gəlirəm.

Sevgi valsı

Gəl, rəqs edək səninlə,

Mələklər savab yazsın

Çiynimizdə ritmlə…

Gəl, üzümüz ölümə

Dözək hər bir zülmə.

Zaman şərə qarışsın,

Gecənin işıqları

Gözümüzdən alışsın…

Tərləsin əllərimiz

Valsın şən notlarında.

Büdrəsin ayağımız

Zər qırçınlı donumda.

Cismim ağırlıq etsin,

Sol qoluna əksimi –

Oynayaq sənin ilə

Ölümsüzlük rəqsini.

Əvəzlik

Cümləmdə şəxs əvəzliyi  axtardım,

Yerinə qoymağa…

Nə sən deyə bilirəm,

Nə də mən varam

Biz olmağa.

Ürkək – ürkək ayrılırıq

Üç nöqtədən biri qalır.

Dizə kimi yalın qalan

Bu xoşbəxtlik

Fikrə dalır.

Tuturam boz hekayəmin

Soldan 5 – ci barmağın

Ötürürəm  qaranlığa

Pozuram

gündən saymağın.

Ümid qarğış çantası

Allahın ətəyinə

Boşaltdım çanta-çanta

Şifahi qarğışları…

Alın yazım olmadı,

Göy üzünə həvalə.

Əzbərlərini pozmur

Bildiyim alqışların…

Bir Şahməran vurmuşdu

Yerin əncər  qatında

Köklü diləklərimi…

”Yolçu yolunda gərək”-

deyib asdım çiynimə

Yaşlı ümidlərimi…

Yorulmuşuq neçəmiz…

Görən, hardan baxasan

Adəmin həyatına?

Elə hey səmt yozuruq,

Yerin yeddi qatına.

           ***

Cəhənnəm mələkləri,

Bezibdi əlimizdən.

Torpağın toxum payı

Kök atıb dərdimizdən.

           ***

Bu yer qoşa budaqdı

Birindən  bar almışıq.

Çoxu ürəyə  düşüb,

Özümüz tək qalmışıq.

            ***

Hərdən  sınaq tapmışıq,

Göylərin cığırında.

Dəhşət görüb azmışıq

Dünyanın axırında.

           ***

Şirin yuxu qaçırmaq,

Gözlərə tələ deyil.

Bir kəpənək uçurmaq

“Təkamül” hələ deyil.

            ***

Seyrələn  buludlara

Çətir tutmaq peşəmiz.

Günah adi günahdı

Yorulmuşuq neçəmiz.

         ***

Yaşamaq asan işdi,

Ölmək çətinə dönüb.

Anası bəşər olan

Övlad yetimə dönüb.

Beş nömrəli palata

Beş nömrəli palata:

Burda bir xəstə yatıb –

Canı möhkəm yansa da,

Ruhu rahatlıq tapıb…

Onun can otağında

Bir pəncərə, dörd divar

Və

Gözləriylə ağ divara yazdığı

Qara sualları var…

“Ciyərim nə rəngdədi,

Qəlbimdə qan hardadı?

Beynimə gedən yolun

Qapıları burdadı?!”

Deyib sıxdı köksünü,

Həkimin gözlərində

Axtarırdı özünü…

…Gecə çox ağır keçdi,

Basıldı qara düymə.

Dərdindən o söylədi

Növbədəki həkimə…

Səhər beş dəqiqəlikdə

Verildi bu məlumat:

“Beşinci palatanı

Evə yazın tam rahat…”

Diaqnoz:

Ruh adamı,

Xəstəliyi sevgidi –

Onun yeri bura yox,

Sevdiyinin evidi.

Dünyanın qırağında

Alabaxta səs salır,

Dünyanın qırağında

Günəş qərib boylanır,

Yerində,bucağında.

          ***

Üzülüb  üzüm beli,

Şərab olanda lili,

Mövsümlərdən ən zili,

Yanılır ocağında

            ***

Ölənlər yuxu hörüb,

Günü gecəyə bölüb,

Ay gündüzdən üz görüb,

Dad qalıb  damağında.

            ***

Arılar gülə bəstə,

Oxunub  bal şikəstə,

Sünbülü saçı üstdə ,

Kəsiblər darağında…

             ***

Sevgi eşqin qızıdı,

Dünyanın tarazıdı

Həyat ömrün  nazıdı

Ölümün sorağında.

Gün yeri

Qeybə çəkir sözümü,

Yaddaşlmın gün yeri.

Gecə yeri sualdı,

Nidalıdı dan yeri.

             ***

İslah olur xitabım,

Ulu Tanrıdan bəri.

Toz hesablı kitabın,

Oxunulur dərd-səri.

             ***

Keçir yeddi qatından,

Kamal çağında dəri.

Bezi keçmişə düşür,

Üzünə çıxır zəri.

Cəzalı qəza

Ömrümü qoymuşam atın belinə,

Yüyənini tuta bilmirəm

Amma.

Çalışıram ayaq-ayağa verim,

Nə edirəm, çata bilmirəm

Amma…

Bu at keçib zamanımın üstündən –

Həm yorğası,

Həm dördnalı cəzadı.

Hərdən dizləri üstə dincəlməyi,

Yatmış arzularım üçün qəzadı…

Bu qəzamla hüzuruna gəlmişəm,

Ey Allahım, babalımı de,

Bilim.

Mən qulunam, bəlkə tərsə dönmüşəm –

Tərs haramdı,

Halalımı de, bilim.

Soyuqsan

Əsmə külək yerinə,

Xəzri kimi soyuqsan.

Rəfimdə toz bağlamış,

Kitablarım kimisən,

Oxunmamış qalıbsan.

Düşmə xəta yerinə,

Mərdimazar gəzənlər

Səni günahkar görər.

Döymə taxta qapımı,

Cəftəsi qırılarsa,

Əlini yarı bölər…

Sonra deyərsən – Sarı,

Qanayan yaramı da.

Mən də andım üstünə

Deyərəm – Çözüm barı

Bu qansızan ilqarı…

Qanı görüb qorxarsan,

Gizlənərsən gecədə.

Bir kor yarasa gəlib,

Dəyər sənə küçədə…

Süzülər yağış kimi,

Soyuq tər dabanına.

Birdən baxıb görərsən,

Gerçəklər dağda qalıb,

Çatıbsan Aranına.