EYİLİK ETKEN EYİLİK KÖRER!

Timur QURTUMEROV

Dekabr 14-ti bazar künü. Saba erte, küneş daa endi doğayata. Avası titis, suvuq, qar uçqunlay. Buña baqmadan, bir gruppa yaşlar – qırımtatar faal gruppalarınıñ vekilleri Zernovoye köyüne yol aldılar. Şu künü olarnı aynı bir maqsad – köyde yaşağan bir qartiyge yardım etmek maqsadı birleştirgen.
Meger, Zernovoye köyünde Anife Suleymanova ve onıñ qız qardaşı Alime Celilova qart semetdeşlerimiz, ğayet naçar, zor, müşkül bir alda yaşay ekenler. Olar pek çoq şeylerge muhtaclar. Olarnıñ zorluqlarını, çekişkenlerini körgen qomşular, elbet, qollarından kelgeni qadar yardım etmege tırışalar. Amma bunıñ özü yeterli degil. Böylece, olar “Açıq­ yürek­ler” merhametlik­ teşkilâtı aqqında eşitken soñ, qartlarğa yardım sorap mura­caat etkenler.
“Açıq yürekler” teşkilâtı mektüpni alğan soñ Anife qartananıñ nasıl vaziyette, nasıl yaşağanını baqmaq içün anda volontörlarnı yolladı. Yaşlar qartiylerniñ acınıqlı yaşayışını körip, eppeyi şaşqın alda qayt­tılar. Lâkin çoq tüşünip oturmay, bu adamlarğa yardım etmek yollarını muzakere etip, işke davrandılar. Başta bir qartlarğa odır-budır yemeklik alıp bardılar, azbarda bir-eki işlerni yaptılar. Soñra ise Anife Suleymanovağa yardım etüv aktsiyası ilân etilip, onıñ çerçivesinde para, diger zarur şeyler toplanıldı.
Doğrusını aytsaq, Anife Suleymanova ve onıñ qardaşı yaşağan ev pek fena alda. Evniñ içinde de, tışında da yapılacaq iş çoq. Bu evde eki qart, hasta qadın yaşay. Kimnidir çağırıp, kerekli işlerni yaptırmaq içün paraları yoq. Olar tek pensiyalarına kün köreler. Pensiyaları da az, çoq şeyge para yetişmey.
Anife Suleymanova 1954 senesi Taşkentte doğğan, anda oquğan. Çoq yıllar devamında tiküv fabrikasında çalışqan. Ağır has­ta anasını baqqan. Bu ve diger sebeplerden ötrü, qorantası, bala-çağası yoq.
– Men Qırımğa 2013 senesi qayttım, – dep ikâye ete o. – Çoq qıynaldım. Mında kelgen soñ pasport almağa istedim. Lâkin pas­port bermediler. Bu meseleni çezmek içün eki yıl qapı-qapıdan yurdim. Allağa şükür, pas­port aldım, amma qıyınlıq­lar bitmedi. Propiska meselesini çezmek içün de çoq yürmek kerek oldı. Propiskam olmağanı içün bütün bu vaqıt devamında pensiya almadım. Özbekistanda toplağan bir-eki kümüş aqçama kün keçirmege tırıştım, amma o da çoqqa yetmedi. Soñki param bu evni satın almağa yetti ve biraz da aşamağa qaldı.
Kerçekten de, bu eki qadınnıñ ğayet müşkül bir vaziyette yaşağanı bir kereden közge çarpa. Evniñ tışından divarlarğa penoplast yapıştırılğan olsa da, evniñ içi suvuq, çünki yaqmağa odunları yoq. Azbar qorası da yıqıq, yerde yata…
Qadınlar yaşlarnıñ kel­genlerini körip, pek quvandılar, olarnı sevinçnen quçaqlap öptiler. İç bir şeyge baqmay olarğa başta qave pişirip berdiler. Şübesiz, quvaçları içine sığmağanı körünip tura edi. Olar tosat-tosat yaşlarğa öz minnetdarlıqlarını bildire, böyle merhametli evlâtlarnı östürgen ana-babalarğa evallalar ayta, hayırlı tilek­lerini söyley ediler.

Qaveden soñ yaşlar vaqıtnı coymayıp, işke kiriştiler. Asılında o künü bu evde endi üçünci talaqa keçirile edi. Albu ki, yuqarıda aytqanımız kibi, yaşlar endi bir qaç kere kelip, kanalizatsiya keçirgen, çirkef suvlar içün çuqur qazğan, başqa qol tutqan işlerni yapqan ediler.
Bu keresinde esasen ev içinde çalışmaq, yani vanna qoymaq, elektrik tellerni deñiştirmek kerek edi. Qayd etmek kerek ki, bütün bu kerek şeylerni, bunıñnen beraber çamaşır maşinasını, diger ufaq-tefek şeylerni volontörlar özlerinen alıp keldiler.
Yaşlar bütün kün devamında suvuq demey, toq­tamay çalıştılar. Azbardaki yatqan ağaçlarnı pıçıp, tertipnen tizip qoydılar. Elbet, kimse işten qaçınmadı, er kes bir yaqadan baş çıqarıp çalıştı. Kimdir vannanı yerleştirse, kimdir vanna odasınıñ divarlarını sıladı, qapısını tüzetti, daa kimdir kanalizatsiya borularını çektirdi, elektrikanen bağlı işlerni yaptı. Sofanıñ pencerelerinden suvuq yel urmasın, dep, polietilen qaqıldı.
Bütün bu yardım aktsiyasını, talaqanı keçirmek mesülieti “Açıq yürekler”niñ volontörı Nazif Rostigunıñ üzerinde edi. Onıñ aytqanına köre, bu işke qatılmağa, qartlarğa yardım etip, savap qazanmağa istegen pek çoq olğan.
– Biz, birinciden, ev içine suv keçirmek ve kanalizatsiya qurmaq kerek, dep tüşündik. Birinci talaqada çirkef suvlarını aqızdırmaq­ içün büyük bir çuqur ve kanalizatsiya tranşeyaları qazdıq.­ Ekinci keresinde suv ağını quramaq içün çeşit trubalar alıp keldik, suv ağı ve sanuzel yapmaq içün er şeyni satın aldıq,­ – dedi Nazif. – Bunıñ içün internet vastasınen para top­lap başladıq.­ Bir afta içinde cemaattan 40 biñ rubleden ziyade para toplanıldı. Paradan ğayrı, bazı adamlar bu işlerge kerekli şeylerni alıp keldiler – birisi böyler, digeri ünitaz, daa birleri vanna odası içün qapı ketirdi ve ilâhre. Fursattan faydalanıp, yardım elini uzatqan cemi arqadaşlarımızğa teren minnetdarlığımıznı bildirem. Ekinci talaqada yigitlerimiz çirkef suv çuqurını taşnen örüp çıq­tılar, ev içine suv keçirdiler, evni tıştan penoplastnen örttiler. Bugün yapılğan işlerni özüñiz kördiñiz. Ebet, er kes yoruldı, amma buña baqmadan, olar quvanıp evge kettiler, çünki öz isseni merhametlik işine qoştılar.
Yaşlar işni bitirip, endi qaytmağa azırlanır ekenler, Anife qartana olarnı yibermege istemey, teşekkürini nasıl ifadelemege bilmeyip, de bir oğlannı, de digerini bağ­rına basa, oplay, közünde quvanç közyaşları ile olarnen sağlıqlaşa, tek­rar-tekrar sağollar aytıp, olarnı endi musafirlikke kelmege davet ete.
– Baqıñ, nasıl merhametli, alicenap yaşlarımız bar! Çoq sağ olsunlar! Böyle yaşlarnı terbiyelegen ana-babalar sağ olsunlar! Rabbim yaşlarımızğa tutqan işlerinde yardımcı olsun! Yaşlarımıznıñ biz, qartlarğa yapqan eyilikleri, biñ-biñ qat ziyadesinen qaytsın! Bu yaşlar muabbet qorantalar qursınlar, çoq-çoq balaları olsunlar. Er kes birlik-beraberlikte olsun, ağır vaqıtlarda halqımız bir-birine yardım qolunı uzatsın. Epimiz bilemiz: halqımız er vaqıt özüniñ insanperverligi, alicenaplığınen ayırılıp tura edi, em şimdi de şay. Bizim yaşlarımız er vaqıt birlik olsunlar. Bu dünyada er kesten bahtlı olsunlar. Alla sağlıqlarını bersin! Başlağan işlerini er vaqıt bitirsinler. Er şey olarnıñ qolunda! – degen tilekler ile ozğardı hayırsever yaşlarnı Anife bitay.
Şunı da aytıp keçmek kerek ki, “Açıq yürekler” Anife Suleymanovağa yardım etüvni devam etecek. Meselâ, baarge çıqıp, avalar biraz qızğan soñ­ evniñ damını deñiş­tirmek, aşhane yapmaq planlaş­tırıla. Şimdilik qartlarnıñ keçinmeleri içün para toplanıla. Bu hususta bütün malümatlarnı “Açıq yürekler”niñ içtimaiy ağlarında açılğan saifelerden bilmek mümkün.

Memba : Yañı dünya” gazetası, №2(1436) 2018 s., yanvar 19

Bir cevap yazın

E-posta hesabınız yayımlanmayacak. Gerekli alanlar * ile işaretlenmişlerdir

Pin It on Pinterest