AY NENNİ (Beşik yırı)

Şimdi aneñ kelecek, ayneni,
Beşigiñe qoyacaq, ayneni.
Yuqla, balaçığım, yuqla, ayneni,
Yum közleriñ, gülçigim, ayneni.

Ay-ya desem yaraşır, ayneni,
Gül bağçalar dolaşır, ayneni.
Gül bağçanıñ içinde, ayneni,
Altın beşik yaraşır, ayneni.

Qazan qaynar, qaşıq yoq, ayneni,
Bala ağlar, beşik yoq, ayneni.
Kelgen ketken sallaycaq, ayneni,
Aya desem yaraşır, ayneni.

Ay-ya, balam, yuqlasın, ayneni,
Qırmızı güller qoqlasın, ayneni.
Ösip, büyüp yürgen soñ, ayneni,
Er kes oña suqlansın, ayneni.
Menim balam yuqlasın, ay-ya, ay-ya, ayneni.
1935 s. Men-Sareden alınıp yazılğan
***
Bağçağa qurdım salıncaq, ayneni,
Kelgen, keçken sallaycaq, ayneni.
Ay-ya, ay-ya, ay-ya, ay…
Yuqla, balam, sen.

Eline berdim oyuncaq, ayneni,
Yuqlamaz bu balaçıq, ayneni.
Ay-ya, ay-ya, ay-ya, ay…
Yuqla, balam, sen.

Oğluñ olsa bir bahıttır, ayneni,
Qartayğanda tayaqtır, ayneni.
Ay-ya, ay-ya, ay-ya, ay…
Yuqla, balam, sen.

Qaranlıqta çıraqtır, ayneni,
Pencereñe qapaqtır, ayneni.
Ay-ya, ay-ya, ay-ya, ay…
Yuqla, balam, sen.
1934 s. S. Erecepovadan alınıp yazılğan
********
Ay-ya desem yaraşır, aynenni,
Gül bağçalar dolaşır, aynenni.
Gül bağçanıñ içinde, aynenni,
Altın beşik yaraşır, aynenni.

Qazan qaynar, qaşıq yoq, aynenni,
Bala ağlar, beşik yoq, aynenni.
Kelgen ketken sallaycaq, aynenni,
Ay-ya desem yaraşır, aynenni.
1938 s. K. Ümerovadan alınıp yazılğan
****
Ayya desem, yaraşır, ayneni,
Gül bağçanı dolaşır, ayneni,
Menim küçük qızıma, ayneni,
Neler aytsam yaraşır, ayneni.

Menim qızım yuqlasın, ayneni,
Qırmızı güller qoqlasın, ayneni.
Ösip, büyüp ketken soñ, ayneni,
Qartanasın yoqlasın, ayneni.

Ay-ya, ay-ya, ay-yası, ayneni,
Ne zaman tiyer faydası, ayneni.
Yaz tiymese, qış tiyer, ayneni.
Aşıqmasın anası, ayneni.
***
Ay-ya olsun, ay olsun,
Qoynı tolu nar olsun
Narı tüşip, yar olsun,
Güzellerge aşq olsun.

Yaşap, yaman körmesin,
Yurt yaşamay, ölmesin,
Ay-ya, ay-ya, ay-yası,
Qaçan tiyer faydası.

Faydasından vazgeçem,
Tek tiymesin zararı.
Attım, urdım, taş ile,
Töktim közüm yaşıyle.

Edi qayda barayım,
Bu terisiz baş ile.
Ay-ya, ay-ya, ay-yası,
Qaçan tiyer faydası.
***
O yaş endi bahtlı oldı,
Yuqla, oğlum, yuqla.
İşançlardan canım toldı,
Yuqla, oğlum, yuqla.

İnan, oğlum, kelir vaqıt,
Yuqla, oğlum, yuqla.
Saña yahşı masal attım,
Yuqla, oğlum, yuqla.
***
Ay-ya olsun, ay olsun,
Qoynı tolu nar olsun
Narı tüşip yarılsın,
Yer turğance yaşasın.

Gür-gür eter gögercin,
Yüksek uçar ne içün?
At başını terletip,
Yigit keter qız içün.
***
Ay-ya, ay-ya, ay balam,
Ösip büyüp, sen balam.
Menim qızım ösecek
Gül bağçada kezecek.

Ay-ya, ay-ya, ay olsun,
Aylanğısız bay olsun.
Ösip, büyüp ol mırza,
Yat da yuqla sen Riza.
***
Menim oğlum batır,
Çavup keleyatır,
Altı qoyan, beş tavke
Alıp keleyatır.

Menim balam özekten,
Quvanam da yürekten.
Yuqla, balam, yuqla,
Tatlı tüşnen yuqla.
1927 s. B. Arifovadan alınıp yazılğan

Menim balam yuqlaycaq.
Közçiklerni yumacaq.
Yuqlap-yuqlap qalacaq.
Tezden balaban olacaq.

Ayya-ayya-aynenni,
Yuqlasın da bu bebiy.

Etraftaki quşçıqlar
Tereklerge qondılar.
Yuvaçıqlar içinde
Yuqlap-yuqlap qaldılar.

Ayya-ayya-aynenni,
Yuqlasın da bu bebiy.

Deñizde balıçıqlar
Büllür suvda tındılar.
Taşlar, qumlar arasında
Yuqlap-yuqlap qaldılar.

Ayya-ayya-aynenni,
Yuqlasın da bu bebiy.

Köbelekler yaylada
Çiçeklerge qondılar.
Qanatçıqlarnı büklep
Yuqlap-yuqlap qaldılar.

Ayya-ayya-aynenni,
Yuqlasın da bu bebiy.

Salqın yelçik üfüre
Balaçıqnı yuqlata,
Küneş er keske küle
Batmağa adım ata.

Ayya-ayya-aynenni,
Yuqlasında bu bebiy.

2008 s. “Köz aydın” merkeziniñ hadimleri tarafından
Mayre Seferovadan (Yalta şeeri) alınıp yazılğan

***
Bağçalarda yaptırdım asma salıncaq.
Ötken-keçken sallaycaq.
Eline berdim oyuncaq, aynenni.
Oyna, balam, toyğanca, aynenni.
Oğluñ olsa bir vaqıt, aynenni.
Qartayğanda tayaqtır, aynenni.
Qaranlıqta çıraqtır.
Ayya-ayya-aynenni, yuqlasın da bu bebiy.
2008 s. “Köz aydın” merkeziniñ hadimleri tarafından
Mayre Seferovadan (Yalta şeeri) alınıp yazılğan
***
Ayya-ayya-aynenni
Pek sevem, balam, seni.
Yumulsın seniñ közleriñ,
Er kes aytır : “Aferin”.
Bugün sıçançıq çaptı,
Bu balanı uyattı.
Bala soñ çoq ağladı
Anasını çağırdı.
Anası tez-tez keldi
“Ne kerek saña? – dedi –
Söz diñlesen, ösersiñ,
Yıldızlarğa yetersiñ!”

Balaban olsa, ösmezmi,
Qalığa da boyu yetmezmi,
Qalığa da boyu yetken soñ,
Babası toyunı etmezmi!

Ayya-ayya-ayyası,
Sensiñ Qırım balası.
Vaqıt pek tez keçecek
Qırım balları ösecek.
2008 s. Zöre İsmailovadan (Taraq Taş köyü)
alınıp yazılğan
—————————–
Aynenni
Gulizar Ebubekirova
(Qarasubazar rayonı, Cvetocnoe köyü)AY NENNİ

Menim balam özekten,
Quvanırım yürekten.
Yuqla, balam, yuqla
Tüşler körip, yuqla.

Ayya-ayya-ayyası,
Candan sever anası.
Yaylalarda çalışa
Bu balanıñ babası.

Yuqla, balam, yuqla,
Tüşler körip, yuqla.
Ayya-ayya-ayyası,
Candan sever anası.

 

beşik ninnisi - kırım tatar
beşik ninnisi – kırım tatar

Bir cevap yazın

E-posta hesabınız yayımlanmayacak. Gerekli alanlar * ile işaretlenmişlerdir

Pin It on Pinterest