Aqyarda Noman Çelebicihannıñ hatırası añıldı

Aqyarda qırımtatar siyaset ve cemaat erbabı, I Milliy Qurultaynıñ teşkilâtçısı, Qırım, Litvaniya, Lehistan ve Aqrusiyeniñ birinci Müftisi, Noman Çelebicihannıñ hatırasına bağışlanğan tedbir olıp keçti. Tedbir teşkilâtçıları – Aqyar bölgesiniñ “Aqyar” qırımtatarlar birleşmesi, yerli din cemiyetiniñ azaları, Aqyar Cemaat palatasınıñ azaları ve şeer memuriyetiniñ azalarıdır.

Tedbirde Kezlev bölgesiniñ baş imamı Eskender Memetov iştirak etti. Selâmlav sözlerinde, o, tedbir teşkilâtçıları ve iştirakçilerine teşekkürler bildirip, Qırım Müftisi hacı Emirali Ablayevniñ minnetdarlıq sözlerini yetkizdi.

“Noman Çelebicihan – qırımtatar halqınıñ ulu oğludır, o, halqınıñ güzel kelecegi içün canını feda etti, Qırımnıñ güllemesi ve mında yaşağan halqlarnıñ barışıqlıq ve muabbetlik içinde yaşamaları içün bar küçüni ve bilgisini ayamadı. Halqımıznıñ şu ulu qaramanı aqqında hatıra yüreklerimizde daima yaşaycaq”, – dedi Eskender Memetov.

Tedbir çerçivesinde qırımtatar halqınıñ “Ant etkenmen” milliy marşı yañğıradı, milliy marş sözleriniñ müellifi – Noman Çelebicihandır. Toplanğanlar ögünde Aqyar bölgesi qırımtatarlar birleşmesiniñ başlığı Enver Mamudinov, Aqyar bölgesiniñ imamı Ablâmit İzmaylov, Aqyardaki “Fidan” adlı Qırım qarayları birleşmesiniñ başlığı Yevgeniy Bakal, aqyarlı tarihçı, Aqyar şeeri milliy-medeniy merkeziniñ yetekçi usulşınası Ölga Malinovskaya çıqışta bulundılar.

Tedbir devamında Noman Çelebicihannıñ hatırasını añğan nutuqlar aytlıdı, Naciye Filimonovanıñ yolbaşçılığında “Edebiyet” icadiy taqımı qırımtatar vatanperver yırlarını icra etti, mektep talebeleri Çelebicihannıñ şiirlerini oqudılar.

Tedbirniñ resmiy qısımından soñ iştirakçiler İsyancılar meydanına keçtiler. 20 asırda mında Noman Çelebicihan tutuqlanğan apishane yerleşe edi. Mında, Çelebicihannıñ hatıra tahtası yanında imam Eskender Memetov dua oqudı, bundan soñ tedbir iştirakçileri hatıra tahtasına güldestelerni qoydılar.

İHTAR: Noman Çelebicihan – qırımtatar siyasetçisi, cemaat erbabı, Qırım Halq Cumhuriyetiniñ ilk reisi, I Milliy Qurultaynıñ teşkilâtçısı, Qırım, Litvaniya, Lehistan ve Aqrusiyeniñ birinci Müftisi, qırımtatar milliy marşı olğan “Ant etkenmen” şiiriniñ müellifidir. 1918 sene, fevral 23 künü Noman Çelebicihan mahkemesiz olaraq inqilâpçı gemiciler tarafından öldürildi, onıñ cesedi ise, Qara deñizge atıldı.

• 

Qırım MDİ matbuat hızmeti