ANA QIYMETİ

Dünyada er şeyni qıymeti ola,
Ana qıymetinin yoqtur ölçüsü.
Ayatnın qaç çeşit ziyneti ola,
Ebediy qalğan şey – tek ANA tüsü.

Analar bizlerge taqdir bahşışı,
Bir kere berile böyle mükafat.
Evlatlar, aqlanız ana alğışın,
Ğaflet belasına oğraman ey-at!

Kurremiz aylana, doğa al kuneş,
Başımız üstüne töküle nurlar.
Ömrümüz yolunda bizge daim eş.
Analar bar eken, demek ayat bar.

Ayatta bar eken şefqat, merhamet,
Ayatta bar eken sevgi muhabbet,
Ayatta bar eken işanç, namus-ar,
Episi, episi sizden ANALAR!

Ey, sen afatlardan sarsılğan alem,
Evlatlar qalbine merhamet aşla.
Analar çekmesin eziyet-elem,
Olarnın başına gül-çeçek taşla!

Şakir SELİM
(1942-2008)
Qırım.

Memba : Zelfira Shukurdzhiyeva

Bir cevap yazın

E-posta hesabınız yayımlanmayacak.

Pin It on Pinterest