CEMAAT, AYDIÑIZ ESİMİZNİ TOPLAYIQ!
Afsus ki halqımıznıñ ahlâqı, terbiyesi ve öz-ara munasebetleri, kün keçkeni sayın, beterleşe. Bir taraftan sağ-solğa “satqın” tamğası yapıştırıla, diger taraftan kirli, yalan “donoslar”…
Bir de ne köreyik, içtimaiy ağlar gizli şeytanlıqlarğa yañı ve yañı imkânlar tanıy. Çeşit belgisiz “feyk” facebook saifelerden insanlarğa iftiralar atıla. Siyasetçiler adam tutıp bir-birini qaralay. Bazıları paranoyağa dalıp qabaatsız insanlardan körgenleri içün, olarğa duşmanlıq besley. Bu öyle müşkül belâ ki, ağır neticelerini evlâtlarımız töleyecek.
Cemaat, ne olur, kirmeñiz bu yañlış yollarğa! Başqaları yapsa da, siz yapmañız. Aydıñız, esimizni toplayıq da, başımızğa Allahtan bir belâ kelmesin! Soñ ağlarmız-sızlarmız, dua etermiz, amma dualarımız başımızdan töpege köterilmez.
İnsan olup, insan kibi yaşamaq bar eken, nege zamet, böyle alçaqlıqlarğa tüşmek?!
Babamnıñ ep aytqanı bir söz bar, soñ zamanlar çoq aqlıma kele:
“Adam bardır, adamlarnıñ naqşıdır,
Adam bardır, avan ondan yahşıdır!”
Menden bu qadar…
***
ДЖЕМААТ, АЙДЫНЪЫЗ ЭСИМИЗНИ ТОПЛАЙЫКЪ!
Афсус ки халкъымызнынъ ахлякъы, тербиеси ве озь-ара мунасебетлери, кунь кечкени сайын, бетерлеше. Бир тарафтан сагъ-солгъа “саткъын” тамгъасы япыштырыла, дигер тарафтан кирли, ялан “донослар”…
Бир де не корейик, ичтимаий агълар гизли шейтанлыкъларгъа янъы ве янъы имкянлар таный. Чешит бельгисиз “фейк” фейсбук саифелерден инсанларгъа ифтиралар атыла. Сиясетчилер адам тутып бир-бирини къаралай. Базылары параноягъа далып къабаатсыз инсанлардан корьгенлери ичюн, оларгъа душманлыкъ беслей. Бу ойле мюшкюль беля ки, агъыр нетиджелерини эвлятларымыз тёлееджек.
Джемаат, не олур, кирменъиз бу янълыш ёлларгъа! Башкъалары япса да, сиз япманъыз. Айдынъыз, эсимизни топлайыкъ да, башымызгъа Аллахтан бир беля кельмесин! Сонъ агълармыз-сызлармыз, дуа этермиз, амма дуаларымыз башымыздан тёпеге котерильмез.
Инсан олуп, инсан киби яшамакъ бар экен, неге замет, бойле алчакълыкъларгъа тюшмек?!
Бабамнынъ эп айткъаны бир сёз бар, сонъ заманлар чокъ акълыма келе:
«Адам бардыр, адамларнынъ накъшыдыр,
Адам бардыр, аван ондан яхшыдыр!»
Менден бу къадар…
***
