Qurban – insannıñ Allahqa yaqınlaşmasına sebepçi olğan bir ibadettir. Qurban ibadeti qurban çalınmağa uyğun ayvannıñ ibadet niyetinen, usulına köre, soyulması demektir. 

Qurban ibadeti icretniñ ekinci yılında eda etilmege başlanğan ve Az. Peyğamber (s.a.v.) o yıldan başlap, er yıl qurban çalğan.Qurban em şahıs, em cemiyet içün çoq faydalı bir ibadettir. Birisi qurban çalmaqnen Allahnıñ emrine boysunğanını ve qulluq şuurını taşığanını açıq bir şekilde köstermektedir. Qurban cemiyette qardaşlıq ve yardımlaşma ruhunı canlı tuta, içtimaiy adaletniñ kerçekleşmesini teminley. Alelhusus, et satın alıp olamağan fuqareler çoq olğan yerlerde, onıñ bu rolü daa büyüktir. Zengin kimsege malını Allahnıñ rizası, yardımlaşma ve başqalarınen paylaşma yolunda masraf etmek zevqını ve alışqanlığını teminler,onı saranlıq hastalığından, dünya malına bağlanıp qalmaqtan qurtarır. Fuqareniñ de, barlıqlı qullar vasıtasınen, Allahqa şükür, baylarğa duşmanlıqtan qurtılmasına ve özüni cemiyetniñ bir azası olaraq is etmesine sebepçi olur.

“Biz, (sığır ve deve kibi qurbanlıq) iri ayvanlarnı da sizler içün Allahnıñ (küçüni ve merhametini köstergen) işaretlerinden qıldıq. Olarda sizler içün hayır (faydalar) bar. …
İşte, bu şekilde olarnı sizge boysundırdıq, belki de şükür etersiñiz”.
“Olarnıñ ne etleri, ne de qanları Allahqa yetişir, Oña yetişecek şey sadece taqvañızdır. Sizni hidayetke iriştirgeni içün, Onı büyük tanırsıñız diye, Allah bu (ayvanlarnı), böylece, siziñ faydalanuvıñızğa berdi. (Ey, Muhammed!) Hayır yapqanlarnı (cennetle) müjdele!”

Qurban bayram aqqında 10 meraqlı malümat

1-Qurban bayramı, ya da arapça İd al-Adha, muqaddes yerlerde acılq merasimi bitkeninen qayd etilip başlay. Acılar bir kün evelsi Arafat dağına köterileler, qurban çalınğan künü ise şeytanğa taş atıla ve Kaabe etfı aylanıla.
2-Qurban bayram, Oraza bayramdan 70 kün keçken soñ qayd etile, yani Hicriy taqvim bounca on ekinci aynıñ onuncı kününde.
3-Bayram dört kün qayd etile.
4-Bu bayramda esas olaraq Mina vadiysinde qurban çalmaqtır,amma acışıqqa baramağanlar öz qurbanlarnı yaşağan yerlerinde de çala bileler.
5-Qurban etilecek ayvan qusursız olmaq kerek. Yani topal olmaycaq, quyruğı yerinde olmaq kerek, pek azğın olmaycaq ve ilȃhre. Qoy (qoçqar) 6 aydan yaş olmaycaq, eçki ve balaban ayvan eki yaşna olmaq kerek.
6-Qurban etilgen ayvannıñ eetini, Şeriyat qanunlarına köre, üçke bölmek kere: bir qısmı fuqarelerge berile, ekinci qısmından soy – aqraba, qomşularğa ziyafet yapıla ve üçünci qısmını da özüñe qaldıra bilesiñ. Ve böyleliknen fuqarelerge de yardım ete bilesiñ.
7-Yaşalğan yeriñe baqmadan byram künleri bütün musulmanlar bol – bol et aşaylar ve sofralarda, elbette çoq tatlılıqlar tolu ola.
8-Deyle ki, qoy ve eçkini tek bir adam adından çalmağa mümkün, balaban ayvanlarnı ve develerni yedi adamdam qurban etmege mümkün.
9-Peyğamberimiz Muhammed (asv), Qurban bayramını eñ büyük bayramlardan biri dey edi.
10-Qurban bayramı bayram namazından başlay. Namazdan qaytqan soñ mezarlıqlarğa barılıp dualar oqula ve tek soñ qurbanlar çalına.

MEMBA . https://avdet.org