Hacılar Qırımğa qayttı
98 insandan ibaret olğan Qırım hacılarınıñ nevbetteki taqımı Vatanğa qayttı.
Saatler ve yüzlernen kilometr devam mürekkep yol, alışılmağan şaraitke baqmadan, hac ibadeti lâzim olğan şekilde eda etildi.
Aqmescit şeerinde hacılarnı, Qırım Müftisiniñ muavini Ayder İsmailov ve “AVN-tur” QMDİ hac – operatorınıñ reberi Artur Reşitov qarşıladılar.
Üç aftağa yaqın müddet devamında, Qırım musulmanları, dünyanıñ diger musulmanları ile bir sırada, hacılıq ibadetini yerine ketirdiler, Mekke ve Medinedeki tarihiy meşur yerlerni ziyaret ettiler. Qırım Müftisiniñ muavini, hacılarnı, sağ-selâmet olıp Vatanğa qaytmaları ile hayırladı ve: “Qırım musulmanları diniy idaresi, “AVN-tur” hac-operatorı ile birlikte, bu senedeki hacılıqnıñ teşkil etilüvi ile bağlı vazifelerini tolu sürette eda etti. Bu cümleden, çeşit nazirlikler ve komitetler, dimplomatik gruppaları, naqliyat şirketleri, öteller ve yemek noqtaları ile añlaşmalar tizildi. Cumhuriyet içün ayırılğan kvota toldı ve 800 musulman hacılıqqa barıp oldı. Elhamdulillâh, er şey güzel olıp keçti. Hacılar hayırlısı ile evlerine, qorantalarına qayttılar. Allah ibadetlerini qabul eylesin”, dep ayttı.
Qırım musulmanları diniy idaresiniñ ocaları olğan taqım reberleriniñ aytqanlarına köre, bu müim seyahat devamında hacılar biri-birine destek kösterip, sanki bir aile azaları oldılar. Hacılar da, öz nevbetinde, teşkilâtçılarğa teşekürlerini bildirdi.
QMDİ matbuat merkezi
