Zıncırlı medrese Qırım müsulmanlarına qaytarıldı
2019 senesi mayısnıñ 17-sinde Qırım Cumhuriyeti Nazirler Şurasınıñ 584-R Fermanı ile Bağçasarayda Basenko, 57 adresi boyunca yerleşken “Zıncırlı medrese” diniy kompleksiniñ terkibine kirgen mülk Qırım ve Sevastopol şeeri müsulmanları diniy idaresine bedava qullanuvğa berildi.
Qırım Müftisi hacı Emirali Ablayev, yarımada müsulmanları adından Qırım Başı Sergey Aksönovğa alınğan qarar içün teşekkürler bildire, bundan da ğayrı Müfti QC medeniyet naziri Arina Novoselskaya ve QC DBM “Bağsaray tarihiy-medeniy ve arheologik müzey-qoruğına” Zıncırlı medreseniñ Qırım Müftiligine bedava qullanuvğa qaytarılmasınen bağlı tedbirlerde destek köstergenleri içün minnetdarlığını bildirdi.
Bundan da ğayrı, Qırım Müftisi, RF DD deputatı Ruslan Balbekke ve Milletlerara munasebetler ve sürgün etilgen vatandaşlarnıñ işleri boyunca Devlet komitetiniñ Reisi Lenur Abduramanovğa teşekkürler bildirdi.
“Zıncırlı medrese” musulman aliy oquv yurtunıñ temeli 1500 senesi Mengli Geray tarafından qoyuldı. O, Rusiye Federatsiyasında saqlanıp qalğan eñ qadimiy islâm diniy oquv yurtu sayılmaqta. “Zıncırlı medrese”de bütün müsulman dünyasına belli olğan diniy elita terbiye etildi. Medresede logika, arap filologiyası, felsefe, uquq, esap, telâffüz, astronomiya ve diger dersler berildi. Medreseniñ toprağında cami, onı qurğan insanlarnıñ, ulu diniy şahıslar ve alimlerniñ mezarları yerleşken. XIX asırnıñ 70-ncı seneleri mında belli qırımtatar maarifçisi İsmail Gasprinskiy rus tili derslerini berdi. O, komplesniñ territoriyasında defn etildi.
“Zıncırlı medrese” diniy kömleksi, Rusiye Federatsiyasında, hususan, Qırımda islâm tasiliniñ inkişafında büyük rol oynay. Rusiye Prezidenti Vladimir Pütin, Rusiyede islâm tasiliniñ ğayrıdan canlanuvınıñ müimligini qayd etken edi. Prezident: “İslâm tasili er vaqıt teren olıp, büyük tarihnıñ saibidir. 1917 senesine qadar Rusiye müsulmanlarınıñ ilâhiyatçıları bütün dünyada ürmetli insanlar olaraq tanıldı, olarnıñ fikirlerine büyük qıymet berildi”.
Devlet Başı aytqanına köre, akimiyet Rusiyede islâm tasiline destek köstermege devam etecek.
QC Nazirler Şurasınıñ mezkür Fermanı RF Prezidenti sözleriniñ güzel tasdiqidir.
QMDİ MDT matbuat hızmeti
