Yusuf Bolat
Yusuf Bolat (1909, Aluşta – 1986, Taşkent) – belli qırımtatar yazıcısı.
Yusuf Bolat 1909 senesi Aluşta şeerinde, fuqare bir ailede doğdı. Köy mektebini bitirgenden soñ, Yaltadaki ocalar mektebinde oqudı. Qırım Pedagogik İnstitutınıñ Qırımtatar tili ve edebiyatı bölümini bitirgenden soñ, edebiyat saasında çalıştı. 1939-1941 senelerinde “Sovet Edebiyatı” mecmuasınıñ muarriri oldı.
Yusuf Bolatnıñ edebiy yaratıcılığı, 1929 senesi başladı. Cenkten evel o umumen pyesalarnı yaza edi. O devirde Yusuf Bolatnıñ bir çoq meraqlı pyesası basıldı ve sahnelendi: “Toy Devam Ete”, “Deñiz Dalğasız Olmaz”, “Soñki Gece”, “Arzı Qız” bulardan bazıları.
Yetenekli genç bestekârlar pyesaları içün muzıka yazdılar. “İşlegen Tişler” pyesası içün Asan Refatov, “Toy Devam Ete” pyesası içün Yaya Şerfedinov, “Arzı Qız” içün Yaya Şerfetdinov ile İlyas Bahşış muzıka yazdı.
Bu yıllarda edebiy mecmualarda Yusuf Bolatnıñ “Qoysuz Çoban”, “Balta” ve “Tufanda Qalğan Qoy Sürüsi” adlı ikâyeleri basıldı.
Yusuf Bolat halq qaramanı Alim Aydamaq aqqında “Alim” romanını yazdı. II Cian cenkinden soñ “Saf Yürekler”, “Anife”, “Sadakât” romanlarını yarattı. Yusuf Bolatnıñ yaratıcılığında mizah eserleriniñ de ayrıca müim yeri bardır. Onıñ “Toy Devam Ete” , “İşlegen Tişler”, “Dubaralı Toy” isimli komediyaları büyük ustalıqnen yazılğandır. Yusuf Bolat, qısqa mizahiy ikâyeler mevzusında da usta olğandır. Onıñ mizahiy ikâyeleri “Tabiatım Öyle” isimli kitabında toplanğan.
Yusuf Bolatnıñ ikâyeleri, em münderice, em til ceetinden zengin ve meraqlıdır. Onıñ yaratıcılığı qırımtatar edebiyatınıñ müim bir qısmını teşkil ete.
1986 senesi oktâbr 22 kününde Yusuf Bolat Özbekistannıñ Taşkent şeerinde vefat etti.
QIRIMTATAR VİKİPEDİYASINIÑ MALÜMATI
