Peyğamberimizniñ balalarğa sevgisi
Bizim sevimli, yaş dostlarımız!
Siz, Peyğamberimiz Muhammed Mustafa (salâllahu aleyhi ve sellem) kim olğanını pek yahşı bilesiñiz, inşaAllah.
O, yer yüzünde dünya qurulğanından berli yaşağan bütün adamlardan eñ acayip insan edi.
O, bizim soñki ve eñ büyük Peyğamberimizdir. Bu mubarek insan aqqında bilgi alıp, ayatınen bağlı ikâyelerni eşitip, Oña nisbeten sevgimiz daa çoq arta.
Bizim Peyğamberimiz balaçıqlarnı ne qadar çoq sevgenini bilesiñizmi?
Sevimli Peyğamberimiz Muhammed (salâllahu aleyhi ve sellem) sizler kibi güzel balaçıqlarnı sevgen, olarnen er fırsatta meraqlanğan, selâmlaşqan, oynağan, hasta olğanlarnı ziyaret etken ve balaçıqlarğa eñ güzel terbiyesini bergendir.
Peyğamberimizniñ (s.a.s.) öz balaları da bar edi. Olardan üç oğlan: Kasim, Abdullah ve İbrahim, ve dört qızçıq: Zeyneb, Rukiye, Fatime ve Ummu-Külsum.
Fatime qızından da 6 torunçığı bar edi. Peyğamberimiz (s.a.s.) olarnen oynamağa, vaqıt keçirmege pek seve edi.
Bir kere namaz qılmaq içün camige kirgende sahabeler, Peyğamberimizniñ omuzlarına yaslanğan balaçıqnı kördiler. Şu balaçıq Peyğamberniñ (salâllahu aleyhi ve sellem) Umame adında torunı edi. Namaz başlağanda, er kes balaçıqnıñ tüşmesini bekley edi, amma Peyğamberimiz (s.a.s.) onıñ omuzlarından tüşmege istemegen, balaçıqnı raatsız etmeyip, onıñnen beraber namazını başladı. Ve namaznıñ soñuna qadar torunçığı Umame öz qartbabasından ayırılmadı.
Baqıñız, dostlarım!
Yüregi merhametnen tolu Peyğamberimiz balaçıqlarğa bile ürmet köstergen edi. İbadet etkende de, olarnıñ göñüllerini qırmadan davrana edi.
Bundan da ğayrı, Peyğamberimiz (s.a.s.) balaçıqlarnı sıq-sıq ziyaret etmege de seve edi. Böylece, olarğa büyük insanlarğa kibi ürmet köstere edi.
Balaçıqlar yaşağan evge kirgende, birinciden: “Küçük insan qayda?” — dep, soray edi. Ve “küçük insançıqlar” sevinip, Peyğamberimizni (salâllahu ve sellem) qarşılamağa ve Onıñnen oynamağa çapıp kele ediler. Peyğamber Muhammed Mustafa da balaçıqlarnıñ başlarını siypap, olar içün güzel dualar yapa edi.
GÜLSUM Şirinskaya
