İSMAİL BEY GASPRALINIÑ EV-MÜZEYİ

Bağçasaray şeerinde büyük maarifçi, naşir ve cemaat erbabı İsmail Gaspralı  ev-müzeyi 

Ev-müzey 1921 senesi, Gaspralınıñ 70 yıllığı munasebetinen açılğan edi. On beş yıl evelsi müzey restavratsiya yapılğan soñ, 2001 senesiniñ başında tantanalı sürette yañıdan açıldı. İsmail bey Gaspralı bundan yüz yıl evelsi aynı şu binada meşur “Terciman” gazetasını, bir sıra dergi, derslik ve risalelerni çıqarğan edi. Maarifçi vefat etken soñ bu yerde açılğan müzey 1932 senesine qadar çalıştı.

Soñunda ise müzeyniñ bir çoq eşyaları ğayıp oldı. Bugün ise ev-müzeyde İsmail Gaspralınıñ ayatı ve faaliyetinen bağlı olğan çoqtan-çoq nadir kitap, elyazma ve fotoresimler saqlana. Ulu erbapqa bağışlanğan bir çoq tedbirler ve konferentsiyalar da şu yerde keçirile. Ev-müzey Bağçasaray şeerinde İ. Gasprinskiy soqağında (Hansaray-Çufut qale yolunda) yerleşken.

Багъчасарай шеэринде буюк маарифчи, нашир ве джемаат эрбабы Исмаил Гаспралы  эв-музейи

Эв-музей 1921 сенеси, Гаспралынынъ 70 йыллыгъы мунасебетинен ачылгъан эди. Он беш йыл эвельси музей реставрация япылгъан сонъ, 2001 сенесининъ башында тантаналы суретте янъыдан ачылды. Исмаил бей Гаспралы бундан юзь йыл эвельси айны шу бинада мешур “Терджиман” газетасыны, бир сыра дерги, дерслик ве рисалелерни чыкъаргъан эди. Маарифчи вефат эткен сонъ бу ерде ачылгъан музей 1932 сенесине къадар чалышты.
Сонъунда исе музейнинъ бир чокъ эшьялары гъайып олды. Бугунь исе эв-музейде Исмаил Гаспралынынъ аяты ве фаалиетинен багълы олгъан чокътан-чокъ надир китап, эльязма ве фоторесимлер сакълана. Улу эрбапкъа багъышлангъан бир чокъ тедбирлер ве конференциялар да шу ерде кечириле. Эв-музей Багъчасарай шеэринде И. Гаспринский сокъагъында (Хансарай-Чуфут къале ёлунда) ерлешкен.