GÜLŞƏN BEHBUD (Şeirlər)

Nazım Ahmetli

Kırımınsesi Gazetesi

Azerbaycan Temsilcisi

GÜLŞƏN BEHBUD

(Şeirlər)

Vətən yolunu gözləyir…

Ayağa qalx, Türk dünyası,

Bütövləşək, yumruq olaq!

Türklük özü şərəf-şandır,

Şanımızı uca tutaq!

           ***

Od-alovdan yoğrulmuşuq,

Türk övladı, türk eliyik!

Şah babamız Şah İsmayıl–

Cavanşirlər nəslindənik!

               ***

Haqq-ədalət yolçusuyuq,

Haqq həmişə qalib gəlir!

Əsgər balam, silah götür,

Vətən yolunu gözləyir!

              ***

 Sınaqlardan keçib gəldin,

Tarixlərin yaddaşısan!

Öz andını içib gəldin,

Vətən daşı, yurd daşısan.

              ***

Od-alovdan yoğrulmuşuq,

Türk övladı, türk köküyük.

Axıb-axıb durulmuşuq,

Dünyanın vicdan yüküyük.

              ***

Ər-igidlik dastanısan,

Kitablara sığmayacaq…

Keçmişini qürurla an,

Döyüşlərdə zəfər çalaq!

                ***

 Qüdrətiylə tarix yazan

 Azərbaycan əsgərisən.

 Bu dünyaya sığışmayan

 Qəhrəmanlıq örnəyisən.

                 ***

Tarixlərə  tarix  yazan 

Atatürkük, biz Heydərik,

Qüdrətliyik, sülhsevərik,  

İki  dövlət, bir  millətik!

               ***

Dədə Qorqud ocağıyıq,

Babəklərik, Koroğluyuq.

Keçmişinə qürurla bax,

Döyüşlərdə zəfər çalaq!

                   ***

Ayağa qalx Türk dünyası

Bütövləşək, yumruq olaq!

Türklük özü şərəf-şandır,

Adımızı uca tutaq!

Şikayət

Səndən gileyliyəm, şikayətimi

Borana, soyuğa, qışa deyirəm…

Qoruyan bilmədin məhəbbətimi,

Mənim ürəyimdə yaşa deyirəm.

                    ***

Şaxtalı küləkdən meh istəyirəm,

Qar altdan boylanan nərgizlər kimi.

Mən səndən bir damcı şeh istəyirəm,

Qəlbimdə çağlasın  dənizlər kimi…

Qarabağım,  gəlmişik!

Elim-obam,Vətən deyib gəlmişik,

Həsrətinlə kövrəlmişik, gəlmişik!

İgidlərin yumruq olub, nər olub,

Vətənin hər yanı laləzar olub.

Qarabağım, qucağına gəlmişik!

                   ***

Neçə igid torpağına qarışıb,

Göz yaşıyla bitmişik, tükənmişik!

Pərən-pərən olub, səpələnmişik.

Qarabağım, qucağına gəlmişik!

                    ***

Qoynundan ayrılan  körpələr indi,

Döyüşən qəhrəman əsgərlərindi!

Vətən deyir qalxan, duran, birləşmişik,

Qarabağım,  qucağına gəlmişik!

                  ***

Şadlan yurdum, oyan torpaq,

Ölmüş idik,  dirilmişik…

Sevin, bu yaz  müjdələrlə

Qarabağım, Qarabağım, gəlmişik!

                    ***

Oyan şəhid ruhları, oyan, anam, qardaşım…

Şad xəbərlə ziyarətə gəlmişik,

Yağ, ey yağış, təmizlənsin başdaşları

Qan deyil də,

göz yaşımız qoy torpağa qarışsın!

                        ***

Tut ağacım, necəsən, yelləncəyim bəs hanı?..

Ay ana, sən hardasan, qonum-qonşu hardadır?..

Atamın gəzişdiyi çəpər boyu izlərindən soruşuram,

Ürəyimin közlərindən soruşuram.

Aç gözünü, ay qardaşım, xəbərin varmı,

Gəlmişik….

                          ***

Bulaqlar yerindəmi, gedib sərinlənərik,

Doya-doya yuyunub, saf suyundan içərik…

Keçmişimdən yadigar armud ağacım hanı,

Dərdə əlacım hanı?

Gəlmişik!

                    ***

Akasiya ağacı, hanı tumurcuqların?

Atam səni qoxlayıb hey ətrini

sinəsinə çəkərdi,

Bir budaq quruyanda

Neçə ağac əkərdi.

Gəlmişik!

                      ***

Pəncərələr açılmır, cəftələri pas tutub,

Otuz ilin dərdinə evimiz də yas tutub.

Hanı nərgiz güllərim, siz harda gizlənmisiz?

Xəbərim var sizlərə,  çıxın, daha gəlmişik!

                           ***

Xarabaya çevrilən yamacımız, yolumuz,

Dərdlərə dərman olan quruyub “Cam-Cam”ımız.

Ətirlənin, güllənin sevinin, ay obamız,

Ağdamımız, Şuşamız, Kəlbəcər, Qubadlımız….

Gəlmişik!

                          ***

Sancıldı  Xankəndinə üç rəngli bayrağımız

Çevriləcək  cənnətə yenə Qarabağımız!

İgid, dönməz, qəhrəman

Azərbaycan oğlunu

öyə-öyə gəlmişik

Birləşin Türk Dünyası, – deyə-deyə gəlmişik!

Yavaş-yavaş

Kövrəlir, göynəyir hey için-için,

Dərd ilə sovrulur   o yavaş-yavaş…

Darıxır  yurdunun  havası  üçün,

İçində  qovrulur  o yavaş-yavaş…

                    ***

Fikri-zikri torpağında, elində…

 Bu dünyada nəyi qalıb əlində?

Ağı olub şən nəğməsi dilində,

Qəm ilə yoğrulur o yavaş-yavaş…

                        ***

Sormayın halını yurdsuz qalanın,

Ev-eşiyi, xanimanı talanın.

Üstündən xətt çəkib neçə yalanın,

 Qisasla doğulur o yavaş-yavaş…

            Təsəlli

Oturub  özümlə üz-üzə   hərdən

İttiham  edirəm,  söhbət  edirəm…

Günahkar  çıxarıb  özümü  hərdən,

Özümə  ən  ağır   cəza verirəm.

                        ***

 Qeyb olan  ayların, ötən illərin

Ağrısı  gözümün  yaşından  çıxır.

Köksümdə bir uca   dağa çevrilən 

Qəm-kədər qəlbimin başından çıxır.

                            ***

Soyuqlu-şaxtalı  xəzan ömrümü

Qızdıran  qəlbimin oduymuş, demə.

Aldandım, sınandım hər  addımbaşı,

Təsəllim vicdanın adıymış, demə…

 Qəriblik

 Elə kövrəlmişəm, elə  sənsizəm,

Sinəsi çatlayan torpaq kimiyəm.

Ruhum da tənhadı, qəribsəmişəm,

Küləyə  tuşlanmış   yarpaq kimiyəm…

                   ***

Nədir  taleyimdə  qara  nöqtələr,

Düzülür  ömrümün  vərəqlərinə?

Düşübdü dəryaya bəxt dəftərim də,

Əlimi atdıqca gedir dərinə.

                   ***

Ürəyi sarı sim incidir-nədi,

Qalmayıb taqətim, ağır gəzirəm..

Gözlərim yollara  dikilib indi, 

Yurduma getməyə cığır gəzirəm…

                  ***

Qismətim tənhalıq, taleyim təklik,

Beləcə ötüşdü illərim, ayım…

Göz yaşı, qəm-kədər yağdı ömrümə,

Budurmu Tanrıdan veriləm payım?

Unudulmaz ürək sevən

Unudulmaz  ürək sevən,

Ən dəyərli sərvət kimi.

Gah güldürər vüsal kimi,

Gah ağladar həsrət kimi.

                ***

Unudulmaz  ürək sevən,

Yuxuları ərşə çəkər.

 Baxışlarda görsə, kədər,

 Ürəklərə ümid əkər… 

                 ***

Unudulmaz ürək sevən,

Qəlb ucaldar, ruhda yaşar.

Gah sevinci şahə qalxar,

Gah hicranı aşıb-daşar…

              ***

Unudulmaz  ürək sevən,

Könlümüzün meyli kimi.

Səhralarda eşqə salar,

Məcnun kimi, Leyli kimi.

                 ***

Dərdi-səri əzib keçər-

Şiddətli bir nifrət kimi.

Çəkər ruhu yerdən göyə,

Tanrı vermiş qüdrət kimi…

Məhəbbət oxunsun gözlərimizdən

Eh, mənim bu gecəm  nə uzun oldu,

Yuxum  tikan  kimi  batır  gözümə.

Sarmaşıq fikirlər alıb başımı,

Dolaşıq düşmüşəm özüm-özümə.

                    ***

Suallı-nidalı  baxışlarınla

Yenə dayanıram sənlə göz-gözə.

Sevinək doğulan bu sevgimizə,

Nə yaxşı səninlə gəldik üz-üzə.

                    ***

 Varaq sevgimizin özəlliyinə,

 Qoy sükut göyərsin sözlərimizdən,

 Sevinək  dünyanın   gözəlliyinə,

 Məhəbbət oxunsun gözlərimizdən!…

                       ***       

Hərdən   kövrəlirik, hərdən küsürük,

Ruhumuz inciyir qəlb qırılanda.

Susuruq suallar qarşısında  biz,

Ürəklər yorulmur dərd yorulanda.

                       ***

İndi ürəyimin sahibi olub,

Məni gah ağladıb, gah güldürürsən.

Min əzab verirsən, min hala  salıb,

Çəkirsən sinəmə dağ, öldürürsən…

                   ***

Həsrətinlə  yaşayıram daima,

Gözlərini gecələrim bilirəm.

Səhərlər üzümə gülən günəşi

Sənin ürəyinin  közü bilirəm.

Bütövləşmişik

 Əldə  etməmişəm  nəyisə asan,

Hər işim çıxıbdı daş arasından.

Dərd bir an ayrılmır duyğularımdan,

Boylanır göz ilə qaş arasından.

                    ***

Yaranmış olsaq da bir-birimizçün,

Yazıq  bizlərə ki, ayrı düşmüşük.

Neyləyək,  dərd ilə bütövləşmişik!

Həsrəti sinəyə çəkib, dözmüşük,

                   ***

Bu da bir taledir, bu da bir ömür,

Gecikmiş  sevdayla sürünmək olmur.

 Saxta  gülüş geyib dodaqlarıma,

Qayğısız adamtək görünmək olmur.

                    ***

Bu səssiz sevgini, bu lal sevgini

Gizlədək ürəkdə, gömək torpağa.

Gəl edək son günah, son xəyanəti,

Keçək özümüzdən, gedək uzağa.

Bir  zaman

Bir zaman sevgiylə baxardı gözlər,

İndi baxışlara kölgələr düşüb.

Sükuta çevrilib sevdalı sözlər,

Dil susub, danışmır, dodaqlar küsüb.

                ***

 Sevgi  cığırına  dönən yolları

Ot basıb, kol-kos basıb, dolaşıq düşüb.

Qəlbimi yandıran  sevgi  atəşi

Canımın oduyla qarışıq düşüb.