FOLKLORIMIZNI ÖGRETKEN VOKAL STUDİYASI

Bugünki künde tilimiz, medeniyetimiz ve maneviy zenginligimizniñ saqlanılması halqımıznıñ ögünde turğan esas maqsadlardan biri olmalıdır. Çünki üyken yaştaki adamlarımıznen ve yaş nesilarasındaki bağ ket-kete üzüle, çeşit türlü zemaneviy gacetler ve içtimaiy ağlar sebebinden balalarda halq ağız yaratıcılığımızğa, tarihımız ve medeniyetimizge meraq coyula.

Böyle al öz nevbetinde kelecek nesilniñ bütünley öz tamırlarından ayırılmasına sebep ola bilecegi şübesizdir. Şunıñ içün, büyükler öz evlâtlarına folklorımıznı balalıqtan ögretip, bunıñnen balalarında maneviylik ve ahlâq kibi şeylerni inkişaf ettirerek, Vatanğa, ana tiline, tuvğan halqqa sevgi aşlamaq kerektir. Folklor sayesinde bala öz halqını yaqınca tanıp, onıñ bir parçası olğanını añlap, onıñ kelecegi içün belli bir mesüliyet duyıp, büyügen soñ milletine fayda ketirmege tırışır.
Bunı istidatlı genç yırcı, “Qırım” folklor ansambliniñ solisti Reyan Qadırova da añlap, yaqında Aqmescitniñ merkezinde Qırımtatar vokal studiyasını teşkil etti.
Aprel 1-de öz qapılarını açqan studiyada üç yaşından on eki yaşına qadar balaçıqlar ve olarnen beraber büyükler de qırımtatar muzıka folklorınen tanış olalar, halq yırlarımıznı icra etmege ögreneler.
– Qırımtatar vokal studiyasını açmaq ğayesi mende daa bir qaç yıl evel doğğan edi, niayet, arzum kerçekleşti. Studiyanı açmazdan evel onıñ olacaq dizayni ve işletilecek muzıka apparaturası hususında pek çoq tüşündim, meselege ciddiyce yanaşıp, çalğıcılarımıznen mesleatlaştım. Allahqa şükür, yapqan işimden memnünim, — dedi Reyan.
Genç yırcı muzıka folklorımızğa balalığından meftün. Reyan daa küçük bala ekende Şerifhan bitasınıñ yırlağanını diñlep, onıñ ile halq yırlarımıznı ögrenmege tırışqan.
– Bitamnen beraberlikte ilkide “Eki çeşme” yırını ögrengen edik. Asılında meni er vaqıt yañı bilgiler meraqlandırıp keldi ve muzıka folklorımıznen tanış olğanımnen oña sevda oldım. Doquz yaşımdan ise ihtisaslı şekilde vokalnen meşğul olıp başladım, — tarif ete yırcı.
Reyan Qadırova on yaşında ekende “Tatlı ses” yarışında iştirak etip, ğalebe qazana. Qıznıñ istidatına qıymet kesken belli bestekâr onıñ ustazı ola ve folklorımıznıñ bir çoq incelikleri ve sırlarını açıp, Reyannı saz çalmağa ögrete. Reyan Cemil Karikovnıñ yetekçiligindeki “Maqam” ansamblinen Türkiye, Poloniya, Romaniya, Ukraina sanalarında çıqışta bulunıp, bir çoq cumhuriyet ve halqara yarışlarda iştirak ete.
– Studiyamda balaçıqlarnen tek qırımtatar folklorını ögrenemiz. Menbalalarnıñ icrasına tek fortepianoda degil, “bağlama saz” degen halq muzıka aletinen de zil tutam. Bu işte maña Cemil ağa Karikov eppeyi yardım etti, çoq sağ olsun. Qırımda bu aletni tek bir qaç adam çalmağa bile ve men bu adamlar sırasına kirgenim içün özümli bahtlı duyam. On sekiz yaşımda meşur “Qırım” qırımtatar folklor ansamblinde yırlamaq qısmet oldı. Anda alğan bilgilerim de pek qıymetlidir. Alâ bugün Server ağa Kakura maña ustazlıq ete, — dey Reyan.
Şimdi vokal studiyasında balaçıqlar em gruppalarda, em individual şekilde halq yırlarımıznı yırlamağa ögreneler. Lâkin kelecekte yırcı balaçıqlarnı halq muzıkal aletlerini çalmağa da ögretmege niyetlengenini söyley.
Reyan Qadırova bala terbiyesinde folklornıñ emiyeti büyük olğanını añlay ve onıñ til, tarih ve medeniyetimizniñ ögrenilmesinde büyük yardımcı olğanına inana.
– Bala folklorımıznı ne qadar erte ögrenip başlasa, medeniyetimizni, urf-adtelerimiz ve tilimizni o qadar erte ve yahşı biler, — dep eminlik bildire yırcı.
Vesile MENUSMAN / «Yañı dünya» gazetası