Aqıllı Bir Qartbabanıñ Nasiatı

Aqıllı bir qart ölümi yaqlaşqanda balalarını yanına çağırıp, birer çubuq alıp kelmelerini istey. Balalar babasınıñ emrini yerine ketireler. Qart o çubuqlarnı top etip bağlay. Soñra top çubuqlarnı büyük oğluna uzata ve olarnı sındırmasını istey. Oğlu ne qadar tırışsa da bir arada olğan çubuqlarnı sındırıp olamay. İhtiyar baba çubuqlarnı sırasınen bütün oğlanlarına bere, ama olar da sındırıp olamaylar.
Bunıñ artından çubuqlarnıñ bağını çeze. Çubuqlarnı ayrı-ayrı etip, er oğlunıñ eline birer dane bere. Şimdi er kes elindeki çubuqlarnı sındırsın dey, olar da sındıralar. Tecribeli baba bunıñnen balalarına ne demek istegenini şöyle añlata:
“Evlâtlarım! Çubuqlar bir arağa kelgende sınmağanı alda, bir-birinden ayırılğandan soñ birer – birer nasıl qolaylıqnen sındırılsa; siz de ağa- qardaşlar olaraq er vaqıt bir ve beraber olsañız sizni iç bir kimse yeñip olamaz, raat ve bahtlı yaşarsıñız. Eger parçalanıp dağılsañız, duşmanlarıñız sizni qolaylıqnen yeñer ve böyleliknen, perişan olursıñız. Bu misalnen sizge daima birlik içinde olmañıznı añlatmaq istedim”.
Vaziyet bir qorantadaki qardaşlar içün böyle olğanı kibi, daa da keniş manada vetan topraqlarında yaşağan millet içün de tıpqı bunıñ kibidir.
Milletimizni büyük qorantağa beñzetsek, milletni meydanğa ketirgen insanlarımıznı da, bu büyük qorantanıñ azaları ve bir-biriniñ qardaşları olaraq tüşünmek mümkün.
Sevgili Peyğamberimiz: “Musulman musulmannıñ qardaşıdır” (Buhari) buyurıp, bütün musulmanlarnıñ bir-biriniñ qardaşı olğanını bildire. Bu qardaşlıq da yalıñız dünya ayatında degil. Bu, ölümden soñra da devam etken ve bizni ebediy seadet yurtu olğan cennette buluştıracaq bir qardaşlıqtır.
Bu, öyle bir qardaşlıq ki, iç bir küç onı parçalap olamaz. İç bir küç bizni bir-birimizden qoparıp olamaz.