SELÂM SAÑA, QARA DEÑİZ!
Qırımtatar halqınıñ Vatanğa kütleviy sürette avdet yıllarında halq arasında eñ popular yırlardan biri ‘Selam saña, Qara deñiz!’ yırı olğan.
Bu yırnı bugün de halqımız sevip, begenip diñley ve icra ete. Yırnıñ sözleri merhum şairimiz Yunus Qandım, muzıkası ise bestekar Edip Bağçasaraylı tarafından yazılğan.
SELÂM SAÑA, QARA DEÑİZ!
Selâm saña, Qara deñiz,
Yıllar keçip körüştik.
Menim alım fena degil,
Tek başıma çal tüşti.
Ya, sen deñiz, neler kördiñ,
Neçün közüñ yaşlana?
Ağlama sen, buzlar köçti,
Yañı ömür başlana.
Selâm saña, Qara deñiz,
Ayt sen maña alıñnı.
Öpem seniñ yañğız
qalğan Taşlarıñnı, yalıñnı.
Tek bir şeyni yahşı bilem,
Sensiñ menim taqatım.
Sennen ağlap, sennen külem,
Sensiñ menim hayatım.
Eger ölsem, seniñ yalıñ
Olsun menim mezarım.
Selâm saña, Qara deñiz”
– Kelip aytır ballarım.
Bugün saña dua etem,
Üzülmesin nesilim.
Menim ömrüm, menim Allam Sensiñ,
Qara deñizim
Seni oylap, asret çekip,
Qaç kereler men öldim.
Saña deñiz qaytmaq içün,
Qaç kereler, tirildim.
Bugün saña dua etem,
Üzülmesin nesilim
Menim ömrüm, menim Allam Sensiñ,
Qara deñizim
1989
