Qırımda ezan oquyıcıları yarışınıñ finalı olıp keçti
Aqmescitte “Seit-Settar” müsulman kompleksinde ezannı eñ güzel şekilde oquğanlarnıñ arasında “Ezan sedası” yarışınıñ finalı olıp keçti. Yarışnıñ finalında Qırımnıñ farqlı şeer ve rayonlarından kelgen, saylav turından keçken 30 oquyıcı iştirak etti. Yarış, Qırım ve Sevastopol şeeri müsulmanları Diniy idaresi tarafından ekinci yıl ötkerilmekte. Jüri azası, Aqmescit merkeziy camisiniñ imamı Edem Lümanovnıñ bildirgenine köre, baa qoyuv şartları arasında doğru telâffüz, ses, maqam ve ses keskinligi kibi hususlarğa diqqat ayırıldı. Qayd etmeli ki, 31 finalist arasında on dörtü 16 yaşına yetmegen gençlerdir. Eñ küçük iştirakçi, altı yaşındaki İbragim Kurtametov bala kategoriyasında birinci yer qazandı. Aynı bu kategoriyada ekinci yerni Damir Canbazov, üçünci yer ise Bilâl Settarov elde ettiler.
Qırım müsulmanları Diniy idaresiniñ hadimlerinden ibaret olğan jüriniñ qoyğan baalarına köre, büyükler kategoriyasında üçünci yerni Muhammed Zekeryayev aldı, ekinci yerge Ravşan Dihkanov nail oldı, üçünci yerni ise Büyük-Onlar qasabasınıñ sakini Talât Seytablayev qazandı.
Ğalipler bahşışlar ve para mukâfatı, iştirakçilerniñ episi ise hatıra bahşişları ile taqdirlendi.
Mukâfatlav merasiminde Qırım Müftisi hacı Emirali Ablayev iştirak etti. O, finalistlerni hayırlap, olarğa teşekkürlerini bildirdi ve bu kibi yarışlar Qırımda ezan daima yanğıracığına ümüt bergenini qayd etti.
Qırım müsülmanları Müftisi: “Dinimiz – bizim eñ büyük baylığımızdır, bizim borcumız ise – yaş nesilge dinimizge sevgi aşlamaqtır. Bu – merasimlerimizniñ esas maqsadı”, – dep ayttı.
Taqdirlev merasiminiñ soñunda tedbir iştirakçileri ve musafirleri cemaat namazını qıldılar.
Hatırlatamız, “Ezan sedası” Bütünqırım yarışınıñ saylav basamaqları baarde Aqmescit, Bağçasaray, Eski Qırım, Canköy, Krasnoperekopsk, Qarasuvbazar şeerlerinde, İslâm – Terek, Qurman ve Aqmeçit rayonlarında keçirildi.
