OYAN!

Dil susub, göz kor olub, beyin anlamır dünyanı,
Dostmudur, düşmənmidir bilinməz sarıb hər yanı,
Haqq nahaq, nahaq da haqq, qurtara bilmirəm canı,
Doğmalı boz təpədə boz aydı, Boz Qurdum, oyan!

*****
Baxıram aynaya boşdur, görən varmıdır üzümü,
Kim, harda boyayıbdı tapa bilmədim özümü?
Səvlərim başdan aşır, axtarmaqdayam düzümü,
Doğmalı boz təpədə boz aydı, Boz Qurdum, oyan!

*****
Atilladan əmanət, İki Başlı Qartal olan,
Göy bayraq, göy səmada yenə qururla dalğalan.
Turan eli gəlməkdə, dünya, haqq üçün çalxalan,
Doğmalı boz təpədə boz aydı, Boz Qurdum, oyan!

*****
Alınacaq qisası düşmənimdən hər ahımın,
“Özünə dön, millətim!” fərmanı budur şahımın.
Atlanın, “səfər bizim zəfər isə Allahımın,”
Doğmalı boz təpədə boz aydı, Boz Qurdum, oyan!

*****
Mən bəyəm, bəy nəslindən, bəydi atam, babam mənim,
Min kəz düşmən biləyin əydi atam, babam mənim,
Bu gecə yuxularıma dəydi atam, babam mənim,
Dedi: qalx, boz təpədə boz aydı, Boz Qurdum, oyan!

Rahim Vahid