Qırımtatar Halk Yırı – Acı molla, Qurtmolla

A-a-a-y!
Men Qırımnı dolaştım,
Köp kişimen soraştım,
Noğaylarnıñ adların
Eşitken soñ toqtaldım.
Eñ begengen adlardan
Aytayım da sizlerge.
Acı da molla, Qurtmolla!
Acı molla, Qurtmolla!
Ablâzizmen, Menğazı,
Meñseyitmen, Qurtseyit,
Şevket, Aliniñ Baldızı
Aledinmen, Saledin
Sapvedinmen, Samedin,
Acı da molla, Qurtmolla!

A-a-a-y!
İsteseñiz sizlerge
Taa, taa cırlayım,
Noğaylarnıñ adların
Sırlap-sırlap aytayım.
Eñ aruvıñ içinden
Saylayım da aylayım.
Acı da molla, Qurtmolla!
Acımambet, Qurtmambet,
Calmambetmen, Qalmambet,
Eşmambetmen, Dostmambet,
Körmambetmen, Bekmambet,
Bormambetmen, Tırmambet,
Arsmambetmen, Calmambet,
Acı da molla, Qurtmolla!

A-a-a-y!

“Qazan asmaz” – Emirali,
“Çıplaq bacaq” – Qurtveli,
“Mavker” – Osman, “Zır” – Selim,
“Qalpaq qulaq” – Seydali,
“Çarıq avuz” – Seythalil,
“Kör-kör” – Seyit, “Taz” – Abla,
“Dal-dal” – Osman, “Toq” – Sulman,
“Zilmiy” – Ayşe, “Zil” – Fatma,
“Qaqaç” – Selime, “Yar” – Alime,
“Oqlav böylü” – Şeyide,
“Papiy ayaq” – Peride,
“Qravıçalmaz” – Pahriye,
“Çullı-başlı” – Şaziye,
“Qırmızı biber” – Sabriye,
“Qırmızı biber” – Sabriye!