2022 Yılı hayırlı olsun!
Dünya Qırımtatar Dernek Başqanı Mustafa Sarıkamış Mühterem Halkım, cümleñizge Yañı Yıl hayırlı olsun!
Haq Taalânıñ yardımı ile, 2022 senesi epimizge hayırlı, quvançlı mücdeler bağışlasın. Barsın, Yer denilgen dülber seyyaremizniñ çeşit qıtalarında, onıñ bütün köşelerinde, bu cümleden Vetanımız – Qırımımızda tek barışıq, tınçlıq-amanlıq, bahıt-seadet, quvanç, muvafaqiyet üküm sürsin. Haq Taalâ cümlemizni Millet Yolundan – Vetan Yolundan şaşırmasın, İmandan ayırmasın, İmanımıznı daa ziyade qaviyleştirsin.
Yañı 2022 senesi de er birimizniñ evimizge, qalbimizge kelip kirdi, yerleşti! “Yer” dep adlandırılğan seyyaremizniñ er bir sakini, bu cümleden Qara deñiz sailindeki mubarek Qırım toprağı sakinleri – qırımlar da, tarihiy 2022 seneden güzellik – melem berici mücizeler bekleyler.
Barsın, er kimniñ tek müsbet-imanlı tüşünceleri ve niyetleri, tek müsbet arzu-ümütleri ve istekleri yerine kelsin! Haq Taalâ böyle müsbet-imanlı areketlerge – davranışlarğa er vaqıt ve er yerde yardımcı olsun!
Barsın, mezkür Sene, özüniñ yalıñız adaletli areketlerile dünya tarihında ve aynı zamanda Qırım tarihında altın arifler ile yazılıp qalsın! Amin!
Epiñizge – epimizge Yañı Yıl hayırlı olsun!
